Ulloq unnuarlu nalunaarusiaq: Politiit tillinniartoqarneranik takunnissimasinnaasunik ujartuipput
Sapaatiummat unnuakkut Nuummi akunnittarfimmut tillinniartoqarsimavoq.
Assiliisoq: Leiff Josefsen
Tillinniarnernut marlunnut takunnissimasinnaasunik politiit ataasinngornermi ujartuipput.
Qaqortumi inuusuttut ornittagaannut Kassaassumut sapaammi unnuakkut nalunaaqutaq 03.11 tillinniarneq siulleq pivoq.
Kingusinnerusukkut nal. 04.46 tillinniarnerup tullia pivoq. Tassani Nuummi Hotel Nordbomut tillinniartoqarsimasoq politiit nalunaarfigineqarput.
Sumiiffinni taakkunani marlunni suut tillinneqarnersut politiit pigaartuisa pisortaata Jeppe Andsagerip maannamut oqaatigisinnaanngilaa, politiilli takunnissimasinnaasunik paasiniaanermi ikiuutaasinnaasunik tusarfiginnikkusupput.
Politiit oqarasuaataannut sianersinnaavutit uunga: 70 14 48.
