Ulloq unnuarlu paaqqinnittarfiit arlalinnik unammilligassaqartut
Meeqqat inuusuttullu pisariaqartitsisut pillugit paasissutissat annikitsuinnaat amigaataasulluunniit, kiisalu sulisut piginnaasallit ilinniarsimasullu amigaataanerat, ulloq unnuarlu paaqqinnittarfiit unammilligassaasa ilagaat.
- Meeqqat taakku pisariusorujussuarmik pisariaqartitsinerat isumaginiarlugit isumalluutit ikorfartuinerillu pigisatik naammattuaannanngitsut paaqqinnittarfinnit aamma maluginiarneqarsimavoq, ulloq unnuarlu paaqqinnittarfiit
aamma ulloq unnuarlu
neqeroorutit ukiumoortumik nalunaarutaanni allassimavoq.
Modelfoto: Leif Josefsen
Meeraq ulloq unnuarlu paaqqinnittarfimmut inissinneqaraanga pisariaqartitaanik isumassorneqarnissaa ajornakusoorsinnaasarpoq. Isumalluutinik amigaateqarneq meerarlu pillugu paasissutissanik amigaateqarneq ilaatigut pissutaasarput.
Tamanna ulloq unnuarlu paaqqinnittarfiit ukiumoortumik nalunaarusiaanni Naalakkersuisut saqqummiuteqqammigaanni atuarneqarsinnaavoq.
Nunatsinni ulloq unnuarlu paaqqinnittarfinnit 32-usunit 29-t akissutaat ataatsimut katersorneqarput, taakkualu sulinerat unammilligassaallu pillugit oqaluttuat ataatsimut saqqummiuneqarlutik.
Meeqqat pillugit naammattumik paasissutissisoqarneq ajortoq
Paaqqinnittarfiit ukiuni kingullerni meeqqat paaqqinnittarfinnut inissinneqartartut eqqortumik paaqqutarinissaat ajornakusoornerulersimasoq atuarneqarsinnaavoq:
- Meeqqat taakku assigiinngitsunik kingunerluuteqakkajuttarput annertusisamillu katsorsarneqarnissamik pisariaqartitsisarlutik, soorlu tarnip pissusaanik ilisimasalimmik oqaloqateqarnermik imaluunniit tarnikkut ikiorneqarnermik.
- Meeqqat taakku pisariusorujussuarmik pisariaqartitsinerat isumaginiarlugit isumalluutit ikorfartuinerillu pigisatik naammattuaannanngitsut paaqqinnittarfinnit aamma maluginiarneqarsimavoq.
Taakkua saniatigut meeqqap inuusuttulluunniit pinasuartumik inissinneqartumut tunngatillugu paasissutissanit paaqqinnittarfinnit aamma amigaatigineqartartut erseqqissarneqarpoq. Kiisalu sulisut piginnaasaat naammattut amigaataasarlutik:
- Meeqqamik immikkut pinasuartumik inissisimasumik, inissiinermi kingunerluuteqarluni ajornartoornermik qisuariaatinillu nassataqarsimasinnaasut kiisalu najugaqartut allat isumagisariaqarnerannik nassataqartumik, naapertuuttumik tigusinissaq qulakkeerniarlugu sulisut taakku pisariaqartinneqarput, ukiumoortumik nalunaarummi allassimavoq.
Ilaquttaniit paaqqinnittarfimmut qaninnerusumik attaveqalersartut
Inuussuttunut 18-it missaannik ukioqalersimasunut sullinneqarsimasunut namminiilernissaannut ikorfartuinissamik neqerooruteqarnissamik amigaateqarneq ulloq unnuarlu paaqqinnittarfiit aamma eqqaavaat.
Inuusuttut paaqqinnittarfimmiissinnaajunnaartut namminiilernissaannut ikiorneqarnissaannut nukissat illuutillu amigaataammata ulloq unnuarlu paaqqinnittarfiit ilaasa ikorfartuinissamik isumaqatigiissuteqarnertik attassinnaasanngilaat.
Inuusuttunut ukiorpassuarni paaqqinnittarfimmi najugaqarsimasunut tamanna ajornartorsiutaalersarpoq:
- Taama sivisutigisumik inissisimaneq ilaquttanut sanilliullugu paaqqinnittarfimmut qaninnerusumik atassuteqarnermik pilersitsisinnaasarpoq. Taamaattumik paaqqinnittarfiit sinaakkutaasa iluanni malitseqartitsisoqartarnissaa pingaarluinnarpoq, tassani inersimasutut inuulernissamut qajassuussisumik nuukkiartuaarnissaq pisariaqartumik tapersersorneqarluni pisinnaaniassammat, ulloq unnuarlu paaqqinnittarfiit allapput.
