Ulloq unnuarlu pillugu nalunaarusiaq: Angut persuttaasimasoq tigusarineqartoq
Angut Sisimiuni persuttaasimasutut tigusarineqarsimavoq, angullu persuttarneqarsimasoq ajoqusingaatsiarsimammat napparsimmavimmi passunneqartariaqarsimalluni.
Angut persuttaasimasoq tigusarineqarpoq maannakkullu tigummigallarneqarluni.
Foto: Oscar Scott Carl
Kalaallit Nunaanni Politiit Sisimiuni pingasunngornerup unnuaani nal. 00.37 persuttaasoqarneranik nalunaarfigitipput.
Kalaallit Nunaanni Politiini pigaartut pisortaat, Aputsiaq Hansen Sermitsiamut taama ilisimatitsivoq.
- Persuttarneqartoq timimigut niaqqumigullu tilluarneqarlunilu tukertarneqarsimavoq. Persuttarneqarsimasoq kingorna peqqinnissaqarfimmi ikiorneqarsimavoq, Aputsiaq Hansen oqaluttuarpoq.
Taassuma oqaatigaa persuttaaneq sakkortungaatsiartutut nalilerneqarsimasoq, persuttaasimasorlu politiinit maanna tigummigallagaasoq.
- Misissuinerup takutippaa pingasunngornermi ullaakkut pinerluttoqarsimanera sapaatiummat persuttaasoqarneranut attuumassuteqanngitsoq. Suliassat immikkut misissorpavut. Ullumikkut pinerluttoqarsimaneranut tunngatillugu nalilersussavarput tigummigallarneqartoq eqqartuussivimmi sassartinneqassanersoq, pigaartut pisortaat oqarpoq.
