Ullormut nalunaarusiaq: Inuusuttut biilinik tillissimasutut unnerluutigineqartut
Nuummi biilit arlaatigut eqqunngitsoqarneranik pasinarsinnaasut politiinut nalunaarutigineqareersullu inuusuttut ukiukitsut marluk politiinit unitsinneqarput. Taakku biilinik tillissimasutut unnerluutigineqarput. Politiit biililinnut kajumissaaripput.
Assi (arkiv): Mads Claus Rasmussen/Ritzau Scanpix
Biilit "arlaatigut eqqunngitsoqarneranik pasinarsinnaasut" sisamanngornerup unnuaani nalunaaqutaq 02.28 politiinut nalunaarutigineqarput. Aquttup ukiukitsuusinnaanera nalunaarutiginnittup oqaatigaa.
- Politiit biili unitsimmassuk biilertoq ilaasullu ukiukitsuusut paasinarsivoq. Inunnik isumaginnittoqarfik angajoqqaatullu akisussaassuseqartut maanna akulerutsinneqarput, inuusuttullu biilinik tillissimasutut unnerluutigineqarput, politiini pigaartut pisortaat Aputsiaq Hansen oqarpoq.
Politiit biililinnut ima kajumissaaripput:
- Biilisi ikumatiinnarlugit qimatarasigi, aamma matuersaat biiliniitsinnasiuk. Matuersaatit qimaannartarussigit aallarunneqarnissaat ilimanarnerujussuusinnaavoq, oqarpoq.
Hashimik arsaarinninnerit arlallit
Nuup illoqarfiata qeqqanut Nuussuarmullu politiit orniguttaartut pigaartut pisortaat aamma oqarpoq. Pingaartumik illoqarfiup pisiniarfiisa eqqaannut.
- Hashimik arsaarinnittaqattaarpugut. Nalunngilarput inuit pineqartut hashimik tuniniaanissamik siunertaqarlutik sumiiffinniittut. Hashi annikitsoq taakkunani arsaarinnissutigineqarpoq, Aputsiaq Hansen oqarpoq.
