Ullukinnermi ullup affaani sulinngiffeqartalernissamut siunnersuut ingerlaqqittoq 

Peter Olsen Inatsisartut ataatsimiinnerani killitsisimaarpoq. Tamannalu peqquteqarpoq.

Ullukinnermi ullup affaani sulinngiffeqartalernissamut siunnersuut Inatsisartuni ullumi siullermeerneqarpoq. Amerlanerussuteqartut, Naleraq minillugu, isumataapput. Siumulli kissaatigaa ullukinneq ulloq ilivitsoq sulinngiffiussasoq.

Peter Olsenip siunnersuutaa Kultureqarnermut, Ilinniartitaanermut Ilisimatusarnermut Ilageeqarnermullu Ataatsimiititaliap nerrivianiilissaaq. Ullukinneq aningaasanik millioninik atuiffiussanersoq imaluunniit ullut nalliuttorsiorfiusartut sulinngiffiusartullu arlaannik paarlaassisisoqarsinnaanera - Aningaasanik tassanngaaniit aallertoqarsinnaanera oqaluuserisussanngorpaat. 

Ulloq nalliuttorsiorfik

Ullukinnermi ukiup nikinnera pingaarutilik qaammariartulerfia nalliussisarparput, ullorlu nalliuttorsiorfik taanna nammineq ileqqutsinnit aallaaveqarpoq.

Peter Olsenip oqaaseqarneratut ullukinnerup nalliuttunngortinneqarnissaa Inatsisartut siusinnersukkut akuerinikuuaat . Ulloq nalliuttorsiorneq ima nassuiarneqarpoq:

-  Ullorsiorneq ulluuvoq, pisimasoq aalajangersimasoq nalliuttorsiorniarlugu imaluunniit sammisaq aalajangersimasoq malunnartinniarlugu nalliussineqartartut. Ullorsiorfiit pilerfimmikkut siunertamikkullu siammarsimasorujussuupput – inuttut ullorsiorfiit politikkikkut, aningaasaqarnikkut imaluunniit upperisarsiornikkut ullorsiortoqartarluni.

Ulloq nalliuttorsiorfik ullorlu sulinngiffik assigiinngilluinnartut

Aningasaqarnermut Akileraartarnermullu Naalakkersuisoq, Erik Jensen akissuteqaatimini allappoq ulloq nalliuttorsiorfik ullorlu sulinngiffik assigiinngilluinnartuusut.

-  Kalaallit Nunatsinni ullunik sulinngiffeqartarnernik atuutilersitsisarnermik periuseqanngilagut. Suliffeqartut qaqugukkut sulinngiffeqartarnerannik inatsisiliortannginnerput tamatuma kinguneraa. Taarsiullugu sulisartoqarnermi illuatungeriit qaqugukkut sulinngiffeqartoqartarneranik, taamaalillunilu amerlaneritigut qaqugukkut aningaasarsianik matussusiivigineqarnissamut immikkut pisinnaatitaaffeqartoqartarneranik, nammineerlutik maleruagassiortarnerannik sivisuumik nukittuumillu ileqqoqarpugut. 

- Tamanna isumaqatiginninniartarnermik aaqqissuussatsinni tunngaviusumik ileqquuvoq. Taamaalilluni innuttaasut ilagiit nalliuttuini, taakku isumaqatigiissutini maleruagassiorneqarsimanerat pissutigalugu sulinngiffeqartarput.

Sulisartut kattuffii ullup affaani sulinngiffeqalersinnaanermik tapersersuinngillat

Naalakkersuisoq akissummini allappoq aqutsisoqarfiup nunatsinni sulisartut kattuffii anginerit tallimat attaveqarfigisimagai, ullukinnermi sulisut ullup affaani sulinngiffeqarsinnaanerat pillugu sulisartut kattuffiisa isumaat paasiniarlugu.

Mianersortumik isummertoqartoq, ataaserlu toqqaannartumik akerliunerminik oqaatiginnittoq Naalakkersuisoq allappoq:

-  Sulisartut kattuffiisa ilaasortamik ullup affaani sulinngiffeqalersinnaanerannik tapersersuinnginnerat immaqa eqqumiigineqarsinnaavoq. Tassani ullut sulinngiffiit pillugit Inatsisartut inatsisiliussagaluarpata, Inatsisartut taamaaliornermikkut sulisartut kattuffiisa isumaqatiginninniarsinnaanerisa ilaannik arsaarinninnissaat tamatumunnga akissutissaavoq, taamaattummi ullumikkut isumaqatiginninniarnerni aalajangersorneqartarput, Erik Jensen allappoq nangillunilu:

-  Qitiusumit ullormik sulinngiffimmik politikikkut atuutilersitsineq taamaalilluni isumaqatiginninniartarnermi illuatungeriit piffissamik aningaasarsianillu namminneerlutik pingaarnersiuisinnaanerannik pisinnaatitaaffimmik arsaassavai.

Aappaagu piviusunngorsinnaasoq

Peter Olsenip siunnersuutaa maajip ulluisa arfineq-aappaanni aappassaaneerneqassaaq, aappaagulu upernaakkut ataatsimiinnermi saqqummiunneqassalluni.