Siumup Inatsisartunut
ilaasortaatitaata Kuno Fenckerip Namminersornermut Inatsimmi § 21, Kalaallit
Nunaata namminiilivinnissaanut tunngasoq, atuutilersinniarlugu qinigaaffimmi
2021-25-mi suliniuteqarpoq.
Kuno Fencker qinersinissamik
nalunaaruteqarnerup kingorna ullualuit qaangiuttut Naleqqami ilaasortanngorpoq,
tassanilu paragraffi pingaarutilik pillugu sorsunnini ingerlatiinnarpaa.
Siumup Inatsisartunut
ilaasortaatitaata Kuno Fenckerip Namminersornermut Inatsimmi § 21, Kalaallit
Nunaata namminiilivinnissaanut tunngasoq, atuutilersinniarlugu qinigaaffimmi
2021-25-mi suliniuteqarpoq.
Kuno Fencker qinersinissamik
nalunaaruteqarnerup kingorna ullualuit qaangiuttut Naleqqami ilaasortanngorpoq,
tassanilu paragraffi pingaarutilik pillugu sorsunnini ingerlatiinnarpaa.
– Ulluni 100-ni naalakkersuisuunerup kingorna Naalakkersuisut Namminersorlutik
Oqartussat pillugit inatsimmi § 21-p atuutilersinnissaanut imaluunniit
Kalaallit Nunaata namminersulivinnissaanut suliniuteqarnerminni annertuumik
alloriarsimanngitsut ajoraluartumik erseqqippoq, Kuno Fencker Sermitsiamut
oqarpoq.
Naalakkersuisut naalagaaffittut
namminersortutut inissisimalernissamik anguniagaat § 37 naapertorlugu
apeqquterpassuartigut erseqqissarniarpaa. Naalakkersuisut siulittaasuata
Jens-Frederik Nielsenip Inatsisartuni ilaasortat naammagittanngitsut naalakkersuisooqatigiinnissamut
isumaqatigiissut atuaqqissaassagaat kajumissaarpai.
– Naalakkersuisut politikkikkut anguniagaat pingaarnerpaaq tassaavoq
Namminersorlutik Oqartussat pillugit inatsisip nutarternissaa, tamannalu
naalakkersuisooqatigiinnissamut isumaqatigiissummi qupperneq 1-imi 2-milu
allaatigineqarpoq. Danmarkimi naalagaaffimmik isumaqatiginninniarnermi
siunissami suleqatigiinnissamut nutaamik nutaaliaanerusumillu
sinaakkuteqalernissaq siunertaavoq.
Akissut taanna Kuno Fenckerip
naammaginngilaa.
– Kalaallit Nunaata naalagaaffinngornissaa Naalakkersuisunit politikkikkut
anguniarneqarnersoq ersarissumik angeqqullugu naaggaaqqulluguluunniit
qinnuigaara. Jens-Frederik Nielsenip taarsiullugu ataasiinnarmilluunniit
ersarissumik akissuteqarnani naalakkersuisooqatigiinnissamut isumaqatigiissummi
oqaasertaliussat paasiuminaatsut innersuussutigai, ullulerneqanngitsut aamma §
21-mut ataatsimiititaliarsuarmi ilaasortat aqqinik allassimasoqanngitsut.
Innuttaasut Inatsisartullu ersarissumik akissuteqarfigineqanngikkaangata Naalakkersuisut piviusumik siunnerfeqarnersut
imaluunniit piaaralutik akisussaaffimmik avaqqutaarinersut apeqqutaalertarpoq,
Kuno Fencker oqarpoq.
Politikkikkut nangaassuteqarneq
Inatsisartut Kalaallit Nunaanni namminersorneq pillugu inatsimmi § 21
naapertorlugu periarfissai misissussallugit § 21 naapertorlugu
ataatsimiititaliarsuaq pilersinniarlugu siorna aalajangerput.
Naalakkersuisut Múte B. Egede
siulersuisoralugu Aningaasaqarnermut Akileraartarnermullu Ataatsimiititaliaq
suliamut tunngatillugu suliassanut allattukkami § 21-lu naapertorlugu
isumalioqatigiissitamik pilersitsinissaq suliamullu 2 millionit koruuninik aningaasaliissuteqarnissamut
akuerseqqullugit ukiup aallartinnerani qinnuigaat. Taava qinersisoqarnissaa
nalunaarutigineqarpoq, malittarisassallu naapertorlugit ataatsimiititaliap
isumaqatigiittup qinnuteqaatip nukinginnartuunera nalilersortussaavaa. Inuit
Ataqatigiit Siumullu qinnuteqaat qinersisoqarnissaata nalunaarutigineqarneranit
ullut pingasut qaangiuttut akuersissutigaat, Demokraatit Nalerarlu
isummersimanngitsut. Taava ataatsimiititaliami § 21 naapertorlugu
isumalioqatigiissitamik pilersitsinissap akuerineqarnissaa pillugu
tamakkiisumik isumaqatigiittoqanngilaq.
– Naalakkersuisut nutaat suliassiissutigineqartut, ataatsimiititaliaq,
aningaasaqarneq piffissamullu pilersaarut naatsorsuutigineqarsimasoq
isummerfigissavaat, taakkulu Aningaasaqarnermut Akileraartarnermullu
Ataatsimiititaliamut akuersissutissatut nassiutissavagut, Jens-Frederik Nielsen
ilisimatitsivoq.
Naalakkersuisulli Namminersorlutik Oqartussat pillugit inatsimmi § 21
naapertorlugu apeqqutip paasiniarnissaanut inunnik ilisimasalinnik
(politikeriunngitsunik) toqqaassasut paasissutissiissutigaa.
Ullut 100-t maanna
qaangiussimalerput.
– Naalakkersuisut suliap aallartinnissaanut aningaasat tunniunneqarnissaat
pillugu Aningaasaqarnermut Akileraartarnermullu Ataatsimiititaliamut
ingerlaannaq qinnuteqarsinnaasimagaluarput. Taamaammat § 21 naapertorlugu
ataatsimiititaliarsuup suli pilersinneqarsimannginneranut pissutaasoq
tassaanngilaq aningaasanik amigaateqarneq, tassaavorli politikkikkut
nangaassuteqarneq, Kuno Fencker oqarpoq.
Jens-Frederik Nielsenip § 21 naapertorlugu
ataatsimiititaliarsuaq pilersinneqassasoq neriorsuutigaa. Ukioq ataaseq
marlulluunniit qaangiuppata nalunaarusiaq naammassippat Inatsisartuni partiit
tamarmik namminiilivinnissamut pilersaarutip qanoq ingerlaqqinnissaa pillugu
isumaqatiginninniarnissaminnut qaaqquneqassapput.
