ULO ukiuni 50-inngortorsiortoq

Ulkebølip katersortarfiani Sønderborgip eqqaaniittumi kalaallit peqatigiiffiata ULO-p ukiunik 50-inngortorsiorneranut atatillugu tamanut ammasumik arfininngormat nalliuttorsiortoqarpoq. Peqatigiiffik 24-nik ilaasortaqarpoq. Taakkunannga 23-t qaaqqusat peqatigalugit ullormi tassani nalliuttorsiorput.

Peqatigiiffik soqutiginartoq

Susanne Nissen, 73-inik ukiulik, peqatigiiffimmi siulittaasutut februaarimi ukiut 32-nngussavai.

- Unissaanga. Ataatsimeersuarnitsinni tunuassaanga, Susanne Nissen 13-inik ukioqarluni Danmarkimut nuunneq oqarpoq.

Peqatigiiffik ataqatigiilluartuunermik ilisarnaateqarpoq. Ukiut 50-it ingerlaneranni ataatsimiinnerit, pilersaarutaanngitsumik naaperiasaarnerit. Soorlu ilaasortat nereqatigiittarlutik, erinarsoqatigiittarlutik oqaloqatigiilluartarlutilluunniit. Ilaasa angalanissartik ajornakusoortippassuk taava angalanissaq aaqqissuunneqartarpoq tamarmik peqataasinnaanngorlugit.

Susanne Nissenip arlaleriarluni oqarneratut: Pikkoriffivut iliuuserissavagut.

Peqatigiiffik Danmarkimi kalaallit peqatigiiffiinut allanut ukiorpassuarni maligassiuisuuvoq. Ilaasortat siammaseqisumi najugaqarput. Amerlanerilli qanittumi najugaqarput. Ataaserli killeqarfiup illuatungaani najugaqarluni. Tassa Tysklandimi.

Peqatigiiffiup ULO-mik atserneqarnikuunera nalaatsornerinnaanngilaq. Oqalugiartut arlallit arnat nukittuut ULO-mik tigumiarlutik suleriaaseqartut taaguummut tassunga atassuserpaat. Oqaatigineqartutut kalaallit arnat imaannaanngitsut aamma sønderjyderinngornikut. Soorunami Sønderjyskemiutut oqaluttut amerlapput.

ULO ukiup ataatsip ingerlanerani ilaatigut nereqatigiinnernik, inuiattut ullorsiornermi sissami nalliuttorsiornermik, bankortitsinermik Rømømilu nuniagiartarlutik.

Emilie Godbersen

Peqatigiiffik Emilie Godbersenimik suliutigineqarluni aallartinneqarnikuuvoq. Taanna ukiuni 32-ni aningaaserisuunikuuvoq.

Ullormi nalliuttorsiorfiusumi oktobarip 26-ani peqatigiiffiup ilaasortaasa ilaat Oksbølip oqaluffianukarput, tassani Emiliep ilerra naasortalerneqarlunilu tussiarfigineqarpoq. Kingorna katerisimaartoqarpoq, tassani ukiuni 50-ini pisimasut nuannersut quianarsinnaasullu eqqaamasalersaarutigineqarlutik.

Kalaallisut naalagiarneq

Kalaallisut naalagiartoqaqqissinnaanngortoq

Susanne Nissenip oqalugiarnermini qujamasuutigalugu oqarpoq. Marianne Lynge Krog takkussinnaanngippat Ullerup Oqaluffiani palasi Lis-Ann Rotem isumaqatigiissuteqarfigineqarpoq. Ullerup Oqaluffia Erfalasorput kalaallisullu tussiutit pissarsiarinikuuaat.

Ulkebølip katersortarfiani nalliuttorsiorneq

Nereqatigiittoqarpoq. Erinarsoqatigiittoqarluni. Oqalugiartoqartarluni. Oqaloqatigiittoqartarluni. Assiliisoqartarluni. Sarah Grau aamma Mâliánguaq Jørgensen ukiuni 50-ini ilaasortaasimasut naasunik tunineqarput. ULO-p erinarsoqatigiivi, maannakkut piujunnaapajaarnikut, tusarnaartitsipput. Aamma Rasmus Lyberth erinarsorpoq, pisarnertullu ULO-mi ileqqutoqaq pivoq, tassa paggatsitsisoqarluni.

Ulloq puiunaatsuuvoq.