POULSEN
Umiarsualiviit arlallit iluarsaanneqassapput
Umiarsualiviit sinerissamiittut arlallit annertuumik iluarsaanneqarnissaannik pisariaqartitsisoqarpoq. Naalakkersuisut ukioq manna suliassaq aallartissavaat.
Umiarsualiviit arlallit nutarterneqartariaqarput. Ilaatigut Aasianni umiarsualivik ilaavoq.
Sermitsiaq.AG Arkiv
Kullorsuarmi,
Aasianni, Maniitsumi, Kangerlussuarmi, Narsarsuarmi Tasiilamilu
umiarsualiviit pitsanngorsarneqartariaqarlutillu
nutarterneqartariaqarput. Suliaq Naalakkersuisut salliutinniarpaat,
nutarterinerlu sumiiffinni arlalinni ukioq manna aallartissaaq.
Ineqarnermut attaveqaasersuutinullu
naalakkersuisoq, Hans Peter Poulsen (S) ataasinngornermi 22. april
tusagassiortunik katersortitsinermi taama ilisimatitsivoq.
- Maniitsumi inuussutissarsiortut
umiarsualivimmik atuisut ilungersunartorsiorput. Taamaattumik
umiarsualiviup nutarternissaa pisariaqarluinnarpoq. Tamannali
peqatigalugu umiarsualiviup ilaa nutarterneqartillugu
inuussutissarsiortunut matoqqatinneqartariaqarpoq. Umiarsualivimmik
atuisut ajornannginnerulersinniarlugit Maniitsumi
inuussutissarsiortut oqaloqatigaagut. Aasaru nutarterineq
aallartissasoq naatsorsuutigineqarpoq, Hans Peter Poulsen
tusagassiortunik katersortitsinermi ilisimatitsivoq.
Aasianni aamma Kullorsuarmi
nutarterineq ukioq manna pilersaarusiorneqarneqarlunilu
aallartinneqassaaq.
Pinngortitap
umiarsualiviit aserfallatsittarai
Umiarsualivimmik atuisut kisimik
atortunik aserfallatsitsisanngillat, aammali pinngortitap nukiisa
umiarsualiviit ajornerulersittarpaat, taamaattumillu
pitsanngorsaanissaq pisariaqarluni.
Narsarsuarmi umiarsualiviup
pinngortitap nukinganit aseroriartortup iluarsaannissaanut
pilersaarusiortoqassasoq, attaveqaasersuutinut naalakkersuisoq
oqarpoq. Aamma Tasiilami umiarsualiviup sinaani sioqqat
saliiffigineqarnissaat pilersaarusiorneqassaaq, pilersaarusiornerlu
ukioq manna aallartinneqassaaq.
Pisoqaanerit
taarserneqassapput
Kangerlussuup umiarsualiviata
suliarineqarnissaa isumaqatigiissutigineqareerpoq. Kangerlussuup
umiarsuarnut takornariartaatinut allanullu
angallavigiuminarnerunissaa qulakkeerniarlugu ukiuni arlalinni
atuuttussamik isumaqatigiissusiortoqartoq, Hans Peter Poulsen
ataasinngornermi tusagassiortunik katersortitsinermi ilisimatitsivoq.
- Kangerlussuup umiarsualiviani
atortorissaarutit suut taarserneqassanersut misissorpavut. Umiarsuit
orsersorneranni atortorissaarutit sorsunnersuup kingulliup nalaani
atorneqarsimapput, atortorissaarutillu taarserneqarnissaat
piffissanngorpoq atuisut pitsaanerusumik kiffartuussiffiginiarlugit,
Hans Peter Poulsen oqarpoq.
