Umiarsuit takornariartaatit illoqarfimmi pisiniarfiit imaartarpaat
Umiarsuit takornariartaatsit tikikkaangata pisiniarfinni ilisiviit nioqqutissanik imaaruttartut Sisimiuni inuttaasut piffissami makkunani maluginiarpaat. Ingammik naatitaanerusut. Umiarsuit takornariartaatit tikikkaangata pisiniarfimmi ilisiviit nioqqutissanik imaarutinnginnissaanut Pisiffik pilersaarusiornerusariaqartoq, Pisiffik paasissutissiivoq.
Foto: Tôrtia Reimer-Johansen
Morten Siegstad, Sisimiuni najugaqartoq umiarsuit takornariartaatit inuttai illoqarfiup pisiniarfiini pisiniarfileringaatsiartut naammattoorpai. Taassuma takusai naapertorlugit inuttat ilaatigut naatitarsingaatsiarput, pisiniarfimmi naatitat nungulluinnangajallugit, illoqarfimmi innuttaasut pisiniarnissaannik periarfissaarullugit.
- Takornariartaatit taamatut pisiniarujussuartarnerat pisiniarfinni akueriinnarneqartarnera aappaatigut akueriinnaruminaak. Innuttaasummi amigaateqarujussualersillugit tamakkua piniakaasarnerat pitsaasuunngilluinnarmat, Morten Siegstad oqarpoq.
Umiarsuit takornariartaatit pisiniangatsiartarput
Umiarsuit takornariartaatit annertuumik pisiniartarneranni pisiniarfiit imaaruttarneri qaqutigoortuunngitsoq, Pisiffimmi attaveqaqatigiinnermut pisortaq Tina Hansen oqarpoq. Taassumap nassuiaatigaa ajornartorsiut takkutikkajuttoq naatitat killilimmik piusinnaanerat peqqutaalluni. Nerisassanik eqqaanissaq pinaveersaartinniarlugu nerisassat nungutinnaveersaarlugit amerlasuunik toqqortaqarnissaq ajornakusoortarnerarpaa.
- Ilaannikkut pisiniarfinni ilisiviit nioqqutissanik imaqanngitsut umiarsuarmit takornariartaammit imaarneqartarnerat pissutaasarpoq. Naatitaanerusut nunguttarput, nerisassallu igiinnarneqarnissaat pinaveersaartinniarlugu annertuunik piniarsinnaaneq ajornerput ajornartorsiutaavoq, Tina Hansen Sermitsiamut oqarpoq.
Najugaqavissut salliunneqarput
Umiarsuit takornariartaatsit pisiassanik ilaatigut pisiniarujussuartarnerat ilaatigut ajornakusoortitsisinnaagaluartoq, nunaqavissut siulliullugit aallunneqartartut, Pisiffimmi attaveqaqatigiinnermi pisortap Tina Hansenip naqissuserpaa.
- Umiarsuit pisiniarfitsinnut piffissap sivikitsup iluani pisiniarujussuarniarlutik saaffiginnikkaangata itigartittarpagut, nunaqavissut pisiassaqarsinnaaniassammata.
Taamaakkaluartorli umiarsuarni inuttat pisiniarnissaminnut aqqutissarsisartut nassuiaatigaa.
Pitsanngorsaanissamut periarfissaqartoq
Tina Hansenip umiarsuit takornariartaatsit ajornartorsiutitut isiginagit periarfissatut isigai. Taassuma naqissuserpaa umiarsuarnik tikittoqartussaatillugu Sisimiuni pisiniarfiit pilersaarusiorluarsinnaasut, umiarsuarnillu isumaqatigiissusiortoqarsinnaasoq.
- Umiarsuit takornariartaatsit ajornartorsiutitut isiginagit periarfissatut isigaagut. Naleqqussarsinnaanissamut pikkorinnerulersinnaavugut, aamma umiarsuarnik tikittoqartussaatillugu umiarsuarnik siumut pilersaarusiorsinnaavugut, taamaalilluta nunaqavissut takornariallu pisariaqartitaat naaperiarsinnaallugit, naggasiivoq.
