ARNAT IMARSIORTUT ULLUAT
Umiarsuup aquttuata arnap immami naligiinneq misigisaraa
Arfininngorneq maajip ulluisa 18-at tassaavoq nunarsuaq tamakkerlugu arnat imarsiortut ulluat. Ulloq taanna arnanut umiarsuarnik angallassinermut imarsiornermillu inuussutissarsiuteqartunut tunngatillugu iliuuserisimasaannik nersuinermillu nalliuttorsiutiginninnermut, kiisalu taakkunani naligiissitaanermut assigiinngisitaarnermullu tunngatillugu eqqumaffiginninnermut atorneqartarpoq. Pipaluk Bourup arnaavoq umiarsuarmilu aquttuulluni. Taassuma umiarsuarmi arnat angutillu naligiisinneqartutut misigisarpaa.
Pipaluk Bourup Royal Arctic Linep umiarsuaani aquttuuvoq.
Privatfoto / Eget foto
Immap tungujortuusup mallernerani RAL-ip umiarsuaata aquaniippoq Pipaluk Bourup, taassuma umiarsuaq aquppaa.
Qanga nalinginnaagunanngikkaluarpoq arnap umiarsuarmi aquttuunissaa, kisianni ullutsinni nutaaliaanerusumi arnat imarsiornerup silarsuaani aquttuusinnaapput.
- Pissutsit ajorinngilakka, tamatta nalingiimmik
suleqatigiit pigatta, Pipaluk Bourup Sermitsiamut oqarpoq.
Pipaluk Bourup arnaavoq, Royal Arctic Linellu umiarsuaataani aquttuulluni. Taassuma angajoqqaavi, akkaavi atsaalu imarsiortuupput, taamaammat Pipalummut nalinginnaavoq umiartortuunissaq.
Nivikka Skifte Lennert ombord.
Eget foto / Privatfoto
Nivikka Skifte Lennert naligiinnermik aamma misigisaqarpoq. Taanna Royal Greenlandip kilisaataani igasutut atorfeqarpoq:
- Atugassarititaasut eqqarsaatigisaagaanni naligiissitaaneq assigiinngitsitaartuunerlu Royal Greenland iluani pingaartinneqartoq maluginiartarpara. Arnammi kilisaammut misileerusuttut angutitut aalisartutut igasullunniit assigalugit periarfissinneqartarput.
Pipaluk Bourup suleqatinilu ullorsiorlutik grillerissapput:
- Eqqissisimaakannissaagut, unnugu suleqatigiiulluta grillerissaagut, Pipaluk oqaluttuarpoq.
Nivikka Skifte Lennert maannakkorpiaq kilisaamiippoq, taassumalu maluginiarpaa avatangiisimi ulloq maluginiaraat.
- Ulloq nuannersumik maluginiarpara. Suliffinniillu Arnat imarsiortut ullorigaat eqqumaffigineqarnera ersarippoq.
Avataaniikkaluarlungalu aamma ilaquttanniik kammalaatinnik suleqatinniillu pilluaqqutillattaarpunga.
Arnat aamma umiartortuusinnaapput
Arnat imarsiortut ulluannut tunngatillugu Pipaluk Bourup arnanut umiartortunngorusuttunut siunnersuutissaqarpoq:
- Sapiissuseqarlutik
umiartortunngorsinnaapput. Nuannersuaarpoq. Angutaaqqinnaartariaqannginnami
umiartortuuniaraanni. Massakkut qujanartumik arnat amerlartoramik. Taamaammat
innersuunnartorujuuvoq arnat misileerusuttut misiliinissaat.
- Imarsiortunngornissaq pilerigaanni siunnerfigisimagaannilu avataani sulinissaq.
Arnaqatikka siunnersorusuppakka imarsiornermik ilinniarfimmut atuaqqullugit søsikkerhed kursuseqqullugillunniit.
Imarsiortuuneq nuannersorpassuarnik misigisaqarfiusarpoq imminullu unammillernarsinnaasarluni Aammalu inuttut ineriartorfiujuaannarpoq, Nivikka Skifte Lennert naggasiivoq.
Royal Greenland Facebookimini allappoq suliffeqarfiup kilisaataataani arnanik 20-it missaanniittunik aalisartutut, saqisutut igasutulluunniit atorfeqartunik inuttaqarlutik.
