Umiarsuup kinngunerata kingorna annanniutit nutaat piaartumik pisiarineqassapput
Illersornissaqarfiup annanniutaata Pro-740 RHIB-ip ajornartorsiuteqarnera pissutigalugu annaassiniarnissamut pisariaqartinneqartut nutaat pisariaqartinneqarput, Illersornissaqarfiup ministeriaqarfia ilisimatitsivoq.
Umiarsuup alapernaarsuisup Ejnar Mikkelsenip gummibådianik ajutoornerup kingorna gummibådit Pro-740-t isumannaatsuunissaat ajoquteqarnerisalu qulaarneqarnissaat pingaartinneqalerpoq.
Leiff Josefsen
Illersornissaq pillugu Folketingimi partiit isumaqatigiissuteqartut Illersornissaqarfimmut annanniutinik nutaanik ikittunik pisinissaq isumaqatigiissutigaat.
Taama Illersornissamut ministeriaqarfik tusagassiuutinut nalunaarummi allappoq.
Maanna Illersornissaqarfiup umiarsuaanni, ilaatigut Kalaallit Nunaanni angalasartuni, annanniutaareersunut annanniutit nutaat taarsiutaassapput.
Illersornissaqarfiup annanniutigeriigaasa Pro-740 RHIB-it ajornartorsiutaanerisa malitsigisaanik annanniutit nutaat taakku pisariaqartinneqarnerpaanik matussusiissapput, pioreersummi mallersumi naleqqutinngitsut paasinarsisimavoq:
- Illersornissaqarfiup maannakkut annanniutai ajoraluartumik pisariaqartitatsinnut naapertuutinngillat. Taamaattumik Atlantikup avannaani sakkutuullu umiarsuaanni pisariaqartitsiffiunerpaanut annanniutinik nutaanik piaartumik pisisoqassasoq illersornissaq pillugu isumaqatiginninniartut ullumi isumaqatigiissutigaat, illersornissamut ministeri Troels Lund Poulsen aalajangerneq pillugu oqarpoq.
Annanniutit arfinillit angallatigineqartartut 2021-mi kinngulluni ajutoortoqarnerata kingorna killilersorneqalersimasut, siornatigut Issittumi Sakkutooqarfik Sermitsiamut ilisimatitsinikuuvoq.
2021-mi septembarimi umiarsuup alapernaarsuutip Ejnar Mikkelsenip annanniutaasa ilaat kinnguvoq, ilaasullu marluk annanniutip ataani puttallaqqinneq ajulerput ilisimajunnaarlutillu, annappulli.
Siunertanut assigiinngitsunut annanniutit atorneqartorujussuusartut, aalajangersimasumilli killilersorneqartut, Issittumi Sakkutooqarfik naqissusiivoq.
