United Airlines 2026-mi aamma timmisartuussisassasoq
United Airlinesip Nuummiit New Yorkimut aappaagu toqqaannartumik aamma timmisartuussisarnissani uppernarsarpaa.
United Airlinesip Nuummut 2025-mi juunip 14-ianni tikeqqaarnera nalliuttorsiutigineqarpoq.
Assi: Oscar Scott Carl
Amerikamiut timmisartortitseqatigiiffiat United Airlines Nuup New Yorkillu akornanni aasaq manna timmisartuussisalerpoq. 2026-mi aamma timmisartuussisoqartarnissaa United Airlinesip maanna uppernarsarpaa.
Amerikamiut Instagramimi malinnaasut pilersaarusiornermik suleqateqarnermillu pisortap tulliata Patrick Quaylep ima allaffigai:
– Nuummut angalanissamut ukioq manna periarfissaqarsimanngikkuit nutaarsiassatsialaateqarpunga: United issittumi illoqarfimmut kusanartumut 2026-mi uteqqissaaq.
Aasaanerani timmisartuussisarput, ukioq mannalu juunimiit septembarimut aqqut angallaffiulluni. Unitedip aappaagu timmisartuussisarnissaa qaqugukkuussanersoq Patrick Quaylep allataani paasissutissiissutigineqanngilaq.
Nuummiit New Yorkimi mittarfimmut Newarkimut nalunaaquttap-akunneri sisamat affarlu missaat timmisartorfiusarpoq.
United Airlinesip Air Greenlandillu 2026-mi suleqatigiilernissamik soqutiginnillutik Sermitsiamut uppernarsarpaat. Ataatsimik billitseqarluni nunap avataaniit tikittut nunap iluanut ingerlaqqissinnaanngorlugit periarfissanngussaaq.
