Upalungaarsimasut piumasaqaatit naammassinngilaat
SAR-imik upalungaarsimanermut tunngatillugu anguniakkat arlallit anguneqarsimanngillat, tamannalu atortorissaarutit pisoqalisimanerannik pissuteqarneruvoq.
Upalungaarsimanermut piumasaqaatit ilagaat ukiumut ulluni 882-ini umiarsuarnik alapernaarsuisunik marlunnik pingasunilluunniit angalasoqartarnissaa. Piumasaqaat tamanna 2023-mi naammassineqanngilaq, ukiumoortumik ‘Kalaallit Nunaanni Imaatigut Timmisartukkullu Annaassiniartarneq pillugu nalunaarusiami’ inerniliunneqarpoq.
Assiliisoq: Leiff Josefsen
Danmarkimi Annaassiniartarnermut Siunnersuisoqatigiinnit anguniakkat aalajangersarneqarsimasut naapertorlugit Kalaallit Nunaanni SAR-imik upalungaarsimaneq ukiut tamaasa nalilersorneqartarpoq.
’2023-mi immakkut timmisartukkullu annaassiniartartut sulinerat naammaginartuusoq’ ataatsimut isigalugu Annaassiniartarnermut Siunnersuisoqatigiit naliliipput.
Immikkoortortaqarporli anguniakkanik angusinissamut ajornakusoortorujussuarnik.
Taamaattumik „nuna tamakkerlugu annaassiniarnissamut upalungaarsimanermik naammattumik, ajornartoornermi sianernerit tamaasa sunniuteqarluartumik naleqquttumillu qisuariarfigiusinnaasumik, ilaatigut pisariaqartunik naleqquttunillu sakkulersorneqarsinnaasunik pilersitsinissamik“ anguniagaq naammassineqanngilaq.
- Naammassineqanngitsut
Piumasaqaatit takussutissiami ataaniittumi takuneqarsinnaapput, piumasaqaatillu ilaat ataaseq kisimi “ilaannakuusumik” naammassineqarpoq, sinnerilu naammassineqanngillat.
Ajoraluartumik nalunaarusiaq qallunaatuinnaq pineqarsinnaavoq.
Anguniakkat anguniarneqarneranni atortorissaarutit pisoqalisimasut ajornakusoortitsisartut Annaassiniartarnermut Siunnersuisoqatigiit inerniliipput:
- Kalaallit Nunaanni annaassiniartartut atortuisa pisoqaassusiat pissutigalugu annaassiniartartut atortuisa amerlassusaat unammillernartoqarsimavoq, tamannalu upalungaarsimanermi sulisunik amigaateqarnermik kinguneqarsimavoq, ukiumoortumik nalunaarusiami 'Kalaallit Nunaanni Imaatigut Timmisartukkullu Annaassiniartartut pillugit nalunaarusiami' allassimavoq.
Annaassiniarnerit amerlassusaat eqqarsaatigalugu 2023-mi inuit 122-t annaanneqarput, soorlu takussutissiami ataaniittumi takuneqarsinnaasoq.
Ajoraluartumik nalunaarusiaq qallunaatuinnaq pineqarsinnaavoq.
Ukiuni tallimani kingullerni immakkut timmisartukkullu annaassiniartartut agguaqatigiissillugu 93,9 procentit annaasimavaat, tamannalu 94 procentinik piumasaqaateqarnermik ataassilaarpoq. Tamanna 2020-mi annaassiniarnerup annikitsuararsuuneranik pissuteqartoq, taamaalillunilu agguaqatigiissillugu annaassiniarnerit ikilisimanerannik kinguneqartoq, naliliinermi allassimavoq.
Piffissaq qisuariarfiusoq ilinniartitsinerlu pillugit anguniakkat naammassineqarput
Aamma piffissaq qisuariarfiusoq ilinniartitsinerlu pillugit Annaassiniartarnermut Siunnersuisoqatigiit anguniagaqarput.
Anguniakkat taakku marluk 2023-mi naammassineqarput.
Assersuutigalugu ajornartoornermi sianertoqartillugu Aasiaat Radioata Kalaallit Nunaanni Politiinut JRCC-mullu ingerlatitseqqinnissamut piffissaq qisuariarfiussaa agguaqatigiissillugu minutsit arfineq-pingasut inorlugit sivisussuseqassaaq.
Tamanna qisuariarnissamut piffissaq pillugu anguniakkat amerlasuut naammassineqarsimasut ilagaat. Anguniakkat tamarmik nalunaarusiami Folketingip nittartagaani atuarneqarsinnaapput.
