Upernaakkut ataatsimiinneq: Politikkeri qujavoq aamma naalakkersuisunut tatiginnikkunnaarneq
Upernaakkut ataatsimiinnerup ullup kingulliup aallartinnerani Siverth K. Heilmann sivisuumik politikkeritut sulereerluni tunuarpoq. Naalakkersuisunut tatiginnikkunnaartoqaqqipportaaq.
Siverth K. Heilmannip inatsisartuni ilaasortaajunnaarnini nalunaarutigaa tunuarlunilu.
Assiliisoq: Leiff Josefsen
Maluginiaruk: Tatiginninnginnermik taasinermut tunngasut nutaat ilanngunneqarput.
Marlunngormat upernaakkut ataatsimiinnerup ullua kingulleq aallartippoq.
Ukiorpassuarni politikkeriusimasup Atassummilu siulittaasuusimasup Siverth K. Heilmannip Inatsisartuni ilaasortaajunnaarluni tunuarnera nalunaarutigineqarluni ataatsimiinneq aallartippoq. Taarsiullugu Bentiaraq Ottosen ilaasortanngussaaq, taannalu juunip aallaqqaataani 2024-mi Inatsisartunut ilaasortanngussaaq.
Tusarliussinermut atatillugu Inatsisartunut Naalakkersuisunullu ilaasortat arlallit oqaluttarfimmit Siverth K. Heilmannimut qujassuteqarput.
Politikkikkut oqallinnermi ilaannikkut sakkortuallaartartumi naaperiaasinnaanera aaqqiissutissanillu ujartuisarnera pillugu, ilaatigut Naalakkersuisut siulittaasuata Múte B. Egedep (IA) nersualaarpaa.
Nersornaammik sølviusumik nersornaaserneqarnikoq
Ilaquttani piffissaqarfiginerujumallugit taama aalajangersimalluni Siverth K. Heilmann oqaluttarfimmit oqarpoq, politikkereqatillu allat nersualaarinerat nuannaarutiginerarpaa.
2022-mi politikkikkut ukiorpassuarni suliniuteqarnini pillugu Siverth K. Heilmann Nersornaammik sølviusumik nersornaaserneqarpoq.
Naalakkersuisumut tatiginninnginnermik taasititsineq
Ataatsimiinneq ammarneqaqqammitsiartoq Naleqqap tatiginnikkunnaarnermik taasititsinera pissutigalugu ataatsimiinneq unitsinneqarpoq. Naligiissitaaneq assigiinngisitsinnginnissarlu pillugit inatsisissatut siunnersuutip suliarineqarneranut atatillugu tatiginnikkunnaarnermik taasititsivoq.
Naligiissitaanermut Naalakkersuisumut Naaja H. Nathanielsenimut (IA) tatiginninnginnermik taasititsisoqarpoq, nunatsinni innuttaasut innarluutillit illersorneqareersimanersut pillugu akerleriissut pissutigalugu. Naalakkersuisoq eqqunngitsumik paasissutissiisimasoq, Naleraq isumaqarpoq.
IA-p Siumullu Naaja H. Nathanielsenip tatiginartuunera apeqqusersimanngikkaat Inatsisartut siulittaasuat Mimi Karlsen (IA) ataatsimiinneq nal. 12.15 nangeqqinneqarmat ilisimatitsivoq, taamaattumillu oqaluttarfikkut pinngitsoortitsinissamik amerlanerussuteqartut taasinissaannik siunnersuummik saqqummiussilluni, ataatsimiinnerlu ingerlaqqissinnaanngorpoq.
Upernaakkut ataatsimiinnermi Naalakkersuisunut ilaasortanut tatiginnikkunnaarnermik taasititsineq arlaleriarluni saqqummiunneqartarpoq, Inatsisartunili naalakkersuisoqatigiit Inuit Ataqatigiit Siumullu tatiginnikkunnaarnermik taasititsineq itigartittarpaat.
