Upernaviarsummi savaatilinngorniat ilinniarfiat oqummat matuneqarpoq
Upernaviarsummi illut ilinniarfiusut pitsaanngimmata savaatilinngorniat ilinniarfianni atuartitsisoqartarunnaartoq Namminersorlutik Oqartussat paasissutissiipput.
Upernaviarsuk.
Foto: Privat
Savaatilinngorniat ilinniarfianni ilinniartitsineq INUILI-mut nuunneqarpoq. Upernaviarsummi illut ilinniarfiusut pitsaanngimmata taama aalajangiisoqarpoq.
Namminersorlutik Oqartussat pingasunngornermi ualigaa taama nalunaaruteqarput.
- Upernaviarsummi ilinniartut inaasa atuarfimmilu init ilinniartitsiviusartut misissuiffiginerini piffinni assiginngitsuni oqoqartoq paasineqarpoq.
- Ilinniartut sulisullu peqqissusaat isumannaatsumillu artugassaqarnissaat pingaartinneqarmat ilinniakkat erngerluni Narsamut nuunneqarnissaat aalajangiunneqarpoq, ilinniartitaanermut naalakkersuisoqarfik tusagassiutinut nalunaarummi allappoq.
Taamaattumik atuartitsineq Narsami Inuussutissalerinermi Ilinniarfimmi ingerlanneqartalissaaq.
Atuartitsinerit pilersaarutit malillugit nanginneqassasut ilinniartitaanermut naalakkersuisoqarfik allappoq.
- Nutsertariaqalernermi eqqorneqarsimasut Naalakkersuisoqarfimmit ajuusaarfigineqarput, peqqinnissarli pitsaasumillu atugaqarluni ilinniarnerit ingerlanneqarnissaat pingaartinneqarmata taamatut iliornissaq pinngitsoorneqarsinnaasimanngilaq. Init oqummik eqqorneqarsimasut pilersaarusiorfigineqareerpata siunissamilu iliuusissat paasineqarniariarpata nalunaaruteqartoqarumaarpoq, naalakkersuisoqarfik allappoq.
