Upernaviup eqqaani nunaqarfiit sumiginnagaasut

Upernavik 1.070 missaannik inoqarpoq taassumalu nunaqarfinni qulingiluaasuni innuttaasut 1.600-it sinnilaarlugit amerlatigaat, tamaanilu qaleralinniarluni aalisarneq inuussutissarsiutit pingaarnersaraat. 

Nunap immikkoortuani tamaani aningaasat aalisarnermiit isaatinneqartut annertoorujussuugaluartut, taamaattoq nunaqarfinnik ineriartortitsineq annertuumik sumiginnarneqarsimasoq, piaartumillu iliuuseqartartoqartariaqartoq, Avannaata Kommuniani 1. viceborgmesteri aamma Inatsisartuni ilaasortaq, Jens Napãtôᴋ', Naleraq, aggusti naalersoq nunaqarfiit Kullorsuaq, Nuussuaq, Upernavik Kujalleq, Naajaat, Innaarsuit, Aappilattoq, Nutaarmiut, Kangersuatsiaq Tasiusarlu angalaffigereerlugit taama naliliivoq. 

Nunaqarfiit ineriartortinneqarnissaannut pilersaarusiornermik suligasuartussamik ataatsimiititaliamik pilersititsisoqarnissaa kommunalbestyrelsimut taassuma maanna siunnersuutigaa. Taamatullu oqariartuuteqarnera nunaqarfinni aqutsisunit taperserneqarpoq.

Ataatsimiititaliaq nutaaq 

Jens NapãtõK´ Upernavimmi najugaqartoq aggusti naalersoq nunaqarfinni pineqartuni qulingiluaasuni innuttaasunik ataatsimiititsiartorluni angalagami takusaminut quarsaarsimaqaaq.

- Upernaviup nunaqarfiini angalareernerup kingorna erseqqissumik paasinarsivoq nunaqarfiit ukiuni arlaqalersuni ineriartortitsineqarsimanngitsoq, sullissineq amigarluinnartoq aammalu siunissamut pitsanngorsaataasussamik ataqatigiissaakkamik ingerlatsisoqanngivissoq.

- Taamaattumik ataatsimut isigalugu ataqatigiissumik piumasaqaateqarluartumillu pilersaarusiortoqarluni suliniuteqartoqarnissaa pisariaqartinneqartoq ersarissilluinarmat qanoq iliuuseqartumik, nutaamik ataavartumik pitsaanerulersitsisussamik suligasuartussamik suleqatigiissitaliortoqarnissaa aammalu nunaqarfiit pillugit ataatsimiititaliortoqarnissaa kommunalbestyrelsemut siunnersuuteqarfigaara, taanna oqarpoq.

Kommunalbestyrelsimi Tamat Oqartussaaqataanerannut Nunaqarfinnullu Ineriartortitsinermut Ataatsimiititaliaqarpoq, nunaqarfinnulli ataatsimiititaliaq annertunermik piginnaatitaaffeqartoq pilersinneqartariaqartoq Jens NapãtõK´ isumaqarpoq.

Attuumassuteqartut tamarmik peqataasariaqartut 

Nunaqarfinnut ataatsimiititaliaq nutaaq piaartumik pilersinneqartariaqartoq, tassanilu Namminersorlutik Oqartussat, nunaqarfinni aqutsisut innuttaasullu qanimut suleqatigineqarnissaat siunnersuuteqartup pingaartippaa.

- Nunaqarfinni ilai orsertarfeqaratillu pisiniarfeqanngillat, taassumalu saniatigut sunngiffimmi sammisassaqartitsineq inuussutissarsiutinillu inerisaaneq amigarpoq aammali angallanneq peqqinnissaqarfillu iliuuseqarfigineqartariarput.

- Taamaattumik nunaqarfiit ingerlanneqarnerannut attuumassuteqartut tamarmik qanimut suleqatigineqarnissaat avaqqunneqarsinnaanngilaq.

- Ataatsimiititaliaq pilersinneqartussaq nunaqarfinnik ataatsimut isiginnittumik suliaqassaaq. Tassani paasissutissat inuuniarnikkut atukkanut inuussutissarsiornermullu tunngasut katersorneqassapput, taakkulu pilersaarusiornermi atorneqassapput, taanna oqarpoq.

1. viceborgmesterip oqarnera naapertorlugu ataatsimiititaliaq ataavartumik kommunalbestyrelsimut saqqummiussaassaaq.

Taperserneqartoq 

Kangersuatsiami nunaqarfimmi aqutsisunut ilaasortaq Benigne Løvstrøm, Siumut, aamma Nuussuarmi nunaqarfimmi aqutsisuni ilaasortaq Aron Aronsen, Siumut, Jens NapãtõK´-p innuttaasunik ataatsimiisitsineranut peqataapput. Nunaqarfinni ineriartortitsineq annertuumik sumiginnarneqarsimasoq pillugu 1.viceborgmesterip oqariartuuteqarnera taakku tamarmik taperserpaat. Aammali ukioq kommunalbestyrelsimut qinersisoqarnerata kingorna Avannaata Kommuniani politikkikkut siuttuulersut siunissamut isumalluarfigitik taakku oqaatigaat.