USA-p Kalaallit Nunaannut tunngasuni aallartitaqarfiini kiinnat nutaat

Niuertoq 49-nik ukiulik Ken Howery, Sverigemi aallartitaanisoq, USA-mi Senatimit Danmarkimi aallartitassatut akuerineqarpoq.

Pingasunngornerup ullaassaani inuit nittartakkatigut attaveqaqatigiittarfianni X-imi taama allappoq.

- Danmarkimi aallartitatut Senatimit akuerineqarnera ataqqinaatitut tigullugu maniguullunga sulissaanga. USA-p Danmarkillu ikinngutigiilluarnerat ineriartorteqqinniarlugu nunara sinnerlugu sulinissara qilanaaraara, allappoq.

Kalaallit Nunaata aqunneqarlunilu pigineqarnera

USA-p præsidentiata Donald Trumpip Ken Howery Danmarkimi aallartitanngortussatut siorna juullingajalersoq toqqarpaa. USA-p Kalaallit Nunaannik aqutsilerusullunilu piginnittunngorusuttoq taamani aamma oqaatigaa.

Alan Levanthal, 2022-miit 2025-mut Danmarkimi aallartitaasoq Howeryp taarsertussanngorpaa. Leventhal Kalaallit Nunaannut tikeraartaqattaarnikuuvoq ilaatigut Pituffimmut, Nuummut Kujataanut Avannaanullu.

Kalaallit Nunaannit suna kissaatigineqarnersoq ukkatarineqartoq

Alan Levanthal Sermitsiami 2023-mi maajimi apersorneqarnermini Kalaallit Nunaata, Danmarkip USA-llu attaveqatigiinnerat pillugu ima oqarpoq:

- Joint Committee aqqutigalugu suleqatigiippugut, taamaattumik kalaallit sorusunnersut sunillu anguniagaqarnersut tusaaniarparput. Angusavullu naammagisimaaqaakka. Pitsaasumik tunngavissaqarpugut, Kalaallit Nunaallu sorusunnerlu tunaartaralugit sulinerput nangiinnassavarput.

Misigisassarsiortartoq sapiitsuliortorlu

USA-mi aallartitanngortussaq Ken Howery Stanfordip Universitetiani politikki aningaasaqarnerlu pillugit ilinniagaqarpoq. Elon Musk peqatigalugu PayPalimik pilersitseqataasimavoq, kingornalu teknologiimut aningaasaliinerit aallunnikuullugit. 1,5 milliardit dollarit missiliorlugit aningaasaateqarnera naatsorsorneqarnikuuvoq.

Ken Howery misigisassarsiortartuuvoq sapiitsuliortartuullunilu. Nunarsuarmi sumiiffinnut assigiinngitsunut sukkaniukkiarluni, aqqartartutut misigisassarsiorluni, surferluni kaavittuliortullu malersorlugit pisarsimasoq aviisimi New York Timesimi allaaserineqarpoq.

Kalaallit Nunaat pillugu isumaqatigiinniartoqarsinnaanera pissutigalugu Danmarkimi aallartitatut atorfik soqutiginerulersimallugu New York Times-imut oqarpoq.

Ken Howery qaqugu Danmarkimut nuussanersoq suli nalunarpoq.

Nuummi konsulateqarfimmut aallartitaq nutaaq

Susan A. Wilson USA-p Nuummi konsulateqarfiani 2025-mi aggustimi aallartitatut atorfinitsinneqarpoq. Susan A. Wilson Virginiameersuuvoq, ukiorpassuarnilu Washingtonimi USA-p qullersaqarfiani sulisimalluni. Susan A. Wilson Nuummut nuunnginnermini ilaatigut Tyrkiamut, Sloveniamut Jamaicamullu aallartitatut atuuffeqarnikuuvoq.