USA-p Kalaallit Nunaat Amerikap avannarliup illersornissaqarfianut nuuppaa
Politikkikkut amerikami præsidentip assorsuaq kissaatigaa Kalaallit Nunaat USA-p ataaniilissasoq. Kisianni tamanna pisinnaanngippat, suli periarfissaqarpoq illersornissaqarfik aqqutigalugu Kalaallit Nunaat qaninnerulersissallugu, taamalu maanna iluatsippaa.
Maannamut amerikamiut illersornissaqarfiata Kalaallit Nunaanniinnerata akisussaaffigineqarnera US European Command, EUCOM, ataaniippoq. Kisianni Præsident Donald Trumpip Pentagon peqqunikuuaa illersornissamut aqutsinermut pilersaarut allanngortinneqassaspq, taamaalilluni Kalaallit Nunaat toqqaannartumik US Northern Command, NORTHCOM-ip, ataaniilersinneqarluni.
Assiliisoq: Nathan Howard/Reuters/Ritzau Scanpix
Danmarkip Kunngeqarfik sinnerlugu illersornissaqarfimminik, nunatsinni innuttaasunit takuneqarsinnaallunilu malugineqarsinnaasumik Kalaallit Nunaanni annertusaaleruttorfiani, Europalu tamakkerlugu tulleriaaginnarnik Kunngeqarfimmik illersuinermik nittarsaassileruttorfiani aammalu ikiorneqartariaqalerfimmi piareersimaneraleruttorfiani, maannalu sakkutooqarnikkut nunatsinni ersarisseruttorfiani, tassa sungiusarnerni, amerikamiut maanna najuunnerminnik erseqqissaapput.
Præsident Donald Trumpip amerikamiut illersornissamut ministeriaqarfiat Pentagon qaammatit arlallit matuma siorna peqqunikuuaa USA-p sakkutooqarnikkut Kalaallit Nunaanniinneranut akisussaaffik Europamit USA-mut angerlaanneqassasoq.
Pituffik Space Base
Præsidentip peqqussutaa Pentagonip qaammatini arlalinni peqqussutaa piviusunngortinniarlugu sulissutigisimavaa, maanna pilersaarummik piviusunngortitsinissamut piareersimalluni:
- Præsidentip siunertaa malillugu nunallu illersornissamut pilersaarutaata naalagaaffiup illersornissamut pilersaarutit malillugit allannguinerup ataatsimoorussamik illersornissamut piginnaasat nukittorsassavai, nunap immikkoortuani illersornissamut nukittorsaaqataassaaq, aammalu Issittumi ikinnguit suleqatillu akornanni attaveqaatinik annertusaassalluni, Pentagonip oqaaseqartartuisa pisortaat, Sean Parnell oqarpoq.
Taamaalilluni Pituffik Space Base maannamiit toqqaannartumik US Northern Command, NORTHCOM-imut nalunaaruteqartassaaq.
Akuersaarneq - kisianni aamma ernumassuteqarneq
Amerikami præsidentip nalinginnaanngitsumik periuseqarluni Kalaallit Nunaat "pigisassatut aqussassatut" piumasaraa, tamannalu politikkikkut aalassatsitsivoq, taamaakkaluartoq Kalaallit Nunaat Danmarkilu USA-p pilersaarutaanik ilisimannipput, taamatuttaaq arlaleriarlutik naqissusiipput USA 1951-imi illersornissamut isumaqatigiissut naapertorlugu Kalaallit Nunaanni illersornissamik suliaqarnerminik annertusaasinnaatitaasoq.
Kalaallit Nunaat Danmarkilu, annertuumik tatisimaneqaraluarlutik kimigiiserfigineqaraluarlutillu, USA-mik oqaloqatiginninnissamut ammallutillu piareersimajuaannarnerartuarsinnarput, taamaattorli Kalaallit Nunaata pigineqarnissaanik piumasaqaat akerleralugu.
Tigussaasumik akisussaaffimmik nuutsineq qanoq malitseqassanersoq Pituffik Space Base maanna toqqaannartumik US Northern Command ataaniilermat suli nalunarpoq. Kisianni Issittumi isumannaallisaaneq pillugu illersornissaqarfiup ilisimatusarfiani lektori Jon Rahbek-Clemmensen Berlingskemut maajimi oqarpoq, sakkutooqarnikkut illersornissarlu eqqarsaatigalugu iliuuseq pissusissamisoortutut ikkaluartoq, taamaattoq USA-p Kalaallit Nunaat imminut ilanngunniarneranut tunngatillugu ersiutaasinnaasoq oqaatigaa.
