USA-p Nuummi paasiniaasarfiani atorfilittaasimasoq: Kalaallit Nunaat Danmarkilu piareersartariaqarput
Amerikamiut Kalaallit Nunaannik tiguaanissaat ilimananngilluinnarpoq, pisinnaasorli Malcolm Nance isumaqarpoq. DR aamma TV2 taama allapput.
Malcolm Nancy naapertorlugu Amerikamiut nunatsinnut isaassagunik Nuummi mittarfik siulliullugu tiguassavaat.
Assi: Leiff Josefsen
Amerikamiu Malcolm Nance Amerikamiut paasiniaasartuini ukiuni 20-ni atorfeqarsimavoq.
Taanna Kalaallit Nunaata, Danmarkip USA-llu akornanni pisut paasisaqarfiginiarlugit siunissamilu qanoq pisoqaratarsinnaanersoq eqqoriarniarlugu piffissami kingullermi Kalaallit Nunaata sineriaani angalavoq.
DR aamma TV 2 taama allapput.
USA-p sakkutuulersorluni Kalaallit Nunaanni tiguaanissaa ilimaginngikkaluaraa Danmark Kalaallit Nunaallu taamaattoqarsinnaaneranut piareersartariaqarput.
- Taamaattoqannginnissaa 95 procentimik ilimanaateqarpoq. Maannali USA-mi atorfilittat pissaanillit taakkuutillugit 5 procenti sinneruttoq pillugu piareersimasariaqarputit, Malcolm Nance TV2-mut oqarpoq.
Tiguaasoqaratarsinnaanera qanoq isikkoqarnersoq tusagassiuutinut taakkununnga marlunnut oqaluttuaraa. Taanna naapertorlugu USA-p siullertut Nuummi mittarfik tiguassavaat, kingorna politeeqarfik tiguariarlugu kingusinnerusukkut Naalakkersuisut siulittaasuat tigusarissavaat.
Isumaliutiginissaata pisariaqarnera uppernaalluinnarpoq. Donald Trumpilli tamanna eqqarnikuuaa, nakuuserniarnanilu oqaatigiumanngilaa — tassa eqqarsaatigaa, Malcolm Nance DR-imut oqarpoq
Frankrigi sakkutuulersornissamut piareersimasoq
Malcolm Nancyp Danmark sakkutuunik 1500-nik Kalaallit Nunaannut aallartitseqqullugu kajumissaarpaa.
Frankrigi sakkutuunik Kalaallit Nunaannut aallartitsisinnaalluni siornatigut siunnersuuteqarsimavoq. Frankrigip nunanut allanut ministeria Jean-Nöel Barrot januaarip qaammataani radiokkut aallakaatitassiami taama oqarpoq.
- Danmarki ikioqquppat Frankrigi ikiuukkumaarpoq, Ritzau naapertorlugu apersorneqarnermini oqarpoq.
USA-p præsidentiata Donald Trumpip Kalaallit Nunaat sakkutuulersorluni tiguarniarlugu qaammatini kingullerni tallimani arlaleriarluni oqaatigaa. Sakkutuulersorluni tamatuma anguneqarsinnaanera itigartitsissutigiumanngilaa.
USA-p Kalaallit Nunaanni kilitsissiaqarnini annertusarniaraa Amerikamiut tusagassiorfiata Wall Street Journalip maajip arfineq-aappaanni allaaseraa. Tamanna qallunaat kalaallillu politikeriisa sakkortuumik akerlilerpaat.
USA-p Kalaallit Nunaata isumannaatsuuneranut akisussaaffiup Europami sakkutooqarfimmit Amerikamiunut nuunneqarnissaa piffissami kingullermi eqqarsaatigisimavaa.
Malcolm Nance 64-inik ukioqarpoq, ukiunilu arlalinni USA-p sakkutuuisa imarsiortut isertortumik paasiniaasartuini immikkut ilisimasalittut atorfeqarsimavoq. USA-mi paasiniaasartoqarneq pillugu ilisimasaqarluarpoq. Aammattaaq Donald Trump pillugu isornartorsiuilluni arlalinnik atuakkiorsimavoq.
