USA-p qaammat ataaseq marlulluunniit qaangiuppata elektronikinut akitsuusiinermi qaffannissaa aarlerisaarutigaa
Akitsuusiisarnermi sangujoraarneq USA-mi nangittumik ingerlavoq. Siullermik elektronikit akitsuutinut ilaatinneqarunnaarput, tamannali utaqqiisaagallartumik atuuttoq, maanna oqartoqarpoq.
Niuernermik ministeri Howard Lutnick kissaatigaa, USA-mut tunisassiorneq nuunneqassasoq.
Assi: Kayla Bartkowski/Ritzau Scanpix
Elektronikmik nioqqutissat arlallit akitsuuserneqartannginnissaannik Amerikamiut tallimanngormat aalajangernerat utaqqiisaagallartumik taamaallaat atuuppoq.
Taama Amerikamiut niuernermut ministeriat Howard Lutnick, sapaammi ABC Newsimit apersorneqarluni akivoq.
Nioqqutissat taakku "halvledertoldsatser"-inut, “qaammat ataaseq marlulluunniit qaangiuppata atulersussanut” ilanngunneqassapput.
- Nioqqutissat taakku tamarmik halvlederit ataanniissapput, immikkullu ittumik akitsuuserneqassapput, taamaalilluni nioqqutissat taamaattut utersinnaaqqullugit, Lutnick oqarpoq.
- Halvlederinik pissarsisariaqarpugut, chipsinik pisarsisariaqarpugut, fladskærminik pissarsisariaqarpugut. Tamakku USA-mi sanaatorneqarnissaat pisariaqartippagut. Nunat Asiap kujataata kangianiittut pinngitsoorsinnaanngitsutut inissisimaffigisinnaanngilagut, ministeri nangippoq.
Lutnickip tallimanngornermi Trumpip naalakkersuisuisa computerit, telefonit chipsillu akisilluni akitsuutinut ilaatinneqarunnaarnerannik oqariartornerat innersuussutigaa.
Oqariartorneq USA-p Kinamik niuernikkut sorsuunnerani oqariartuutinit sakkortuunit allaanerulluinnarput.
Sapaatiummalli Trumpip SoMemini Truth Socialimi tallimanngormat “akitsuusiinermut ilaatitsinnginnissamik” oqariartortoqarsimannginnera itisiliivigaa.
- Nioqqutissat taakku tamarmik fentanylimut akitsuummik atuuttumik 20 procentinik akitsuusersugaapput, taakkuli “akitsuusiissutinut allanut” nuunneqaannarput, taanna allappoq.
"Fentanylimut akitsuut" Trumpip Kinamut siullermeerluni akitsuusiineranut innersuussineruvoq – Trumpilu naapertorlugu anngiortumik USA-mut nunassinneq USA-mullu fentalylinik anngiortumik eqqussuineq unitsinniarlugu tamakku pipput.
Allatamini Amerikamiut præsidentiata ilanngullugu, kinaluunniit naapertuilluanngitsumik niuernikkut oqimaaqatigiinnermik taasaani akisussaanerminik qaangiissannginnerarpaa.
- Ingammik Kina, Trump allappoq.
Amerikamiut præsidentiata sapaatip akunnerata tulliup ingerlanerani halvlederinut akitsuutit pillugit erseqqinnerusumik oqariartuuteqarnissani, præsidentip timmisartuani Air Foce Onenimi tusagassiortunut oqaatigaa.
Halvlederit immikkut innaallagiami piginnaasaqarput, halvlederinillu atortut ilaqatigut computerini atorneqartarput.
Trumpip akitsuusiisarnera allanngorartorujussuuvoq, taamaaliornerminilu sakkortuumik oqariartortarpoq, sapaatillu akunnerani kingullermi qasukkartitilerpoq, tassanilu Kina kisiartaalluni akitsuutinik sakkortuumik eqqugaavoq, nunarsuullu sinnera ulluni 90-ni qaffasissunik akitsuuserneqarnera unitsikkallarneqarpoq.
Nunat amerlasuut Amerikamiut naalakkersuisuinik saaffiginnillutik isumaqatiginninniaqqinnissanik qinnuteqarnerat pissutaalluni unitsitsigallarneq pisoq, USA-mit oqaatigineqarpoq.
