USA-p Ukrainemut aallartitaa qaartartunik igeriuttakkanik nassiussinissamik nalunaaruteqareernerminni Kyivimut tikittoq

USA-p Ukrainemut immikkut aallartitaa, generali Keith Kellogg, Ukrainemi illoqarfiit pingaarnersaannut Kyivimut ataasinngornermi ullaakkut tikippoq.

Ukrainep præsidentiata Volodymyr Zelenskyj-p atorfilittaanut pisortaq Andrij Jermak inoqatinut attaveqatigiittarfimmi Telegramimi taama allattoq, nutaarsiassaqartitsivik Reuters paasissutissiivoq.

- Illersornissaq, isumannaallisaanerunissaq, sakkussiat, pillaatitut iliuuseqalersaarneq, innuttatsinnik illersuineq aamma Ukrainep USA-llu suleqatigiinnerunnissaat. Tassa oqaluuserisassat arlaqarput, Jermak allattoq Reuters paasissutissiivoq.

USA-p præsidentia, Donald Trump qaartartunik igeriuttakkanik Patriotitut ittunik Ukrainemut nassiussiniarluni nalunaaruteqareersorlu, Kellog Ukrainemut tikeraarpoq. 

Trump taamaaliorniarluni sakkutooqarfiani Joint Base Andrewsimi USA-mi illoqarfiit pingaarnersaata Washington D.C-ip avataaniittumi Danmarkip nalunaaqutaa naapertorlugu ataasinngornermut unnuaanut nalunaarpoq.

Qaartartut igeriuttakkat Patriotitut ittut qasserpiaat nassiunniarini, Trumpip erseqqissaatigerusunngilaa. Aamma qaqugu nassiunniarnerai ilisimaneqanngilaq.

Ukraine qaartartunik igeriuttakkanik Patriotitut ittunik taakkualu igeriunnissaannut atortulersuutinik USA-mit nasseqqunikuuvoq. USA-p taamaaliornissaa nunaminni illoqarfiit russit saassussineranni illersorsinnaanissaannut pingaaruteqartutut, Ukrainep naalakkersuisuisa isigaat.

“Pissaaneq aqqutigalugu eqqissineq tassaavoq præsident Donald Trumpip najoqqutassiaa, tamannalu tapersersorparput”. Andrij Jermak Telegramimi taama aamma allattoq Reutersip paasissutissiissutigaa.

Kelloggip Ukrainep sakkutuuisa, isumannaallisaasuisa isertortumillu paasiniaasartuisa qullersaannik ataatsimeeqatigissamaarpai.

Ukrainep præsidentiata sakkutuumi qullersaat Ruslandip qanoq sakkussiaateqartigineranik Kelloggimut misissueqatiserineqqusimagai, Ukrainep præsidentia sapaammi oqalugiarami oqartoq Reuters allappoq.

“Tapersersuinerup annertusineqarnissaa sapaatip akunnerata ingerlanerani isumaqatigiinniutigineqassasoq, Zelenskyj-p aamma oqaatigaa.

Trumpip NATO-p qullersaa, Mark Rutte, Keith Kelloggip ataasinngornermi Ukrainemiileruttornerani Washingtonimi tikeraartigaa. 

Tamatumunnga tunngatillugu Rusland pillugu pingaarutilimmik nalunaaruteqarniarluni, Amerikamiut præsidentiata siusinnerusukkut ilisimatitsissutigaa. 

Ruslandip præsidentia, Vladimir Putin, pakatsissutigineruleraluttuinnarini, Trumpip oqaatigaa. Ruslandimut pillaatitut iliuuseqalersaarluni, Trumpip siusinnerusukkut aamma oqaatigaa. 

/ritzau/