Utoqqaat napparsimmavinni uninngasarnerannut kommuni aningaasartuuteqarnerulersoq
Qeqqata Kommuniani utoqqaat utoqqaat illuannut nuunneqarnissaminnut utaqqitillutik napparsimmavimmi uninngagallartarnerat aningaasartuutaanerulersimavoq. Kommunip nalunaarusiaa kingulleq naapertorlugu utoqqaat utoqqaat illuannut nuunnissaminnut utaqqitillutik napparsimmavimmi uninngagallartarnerat kommunimut ullormut 2.400 koruuniniit 6.000 koruuninut akeqartartoq, utoqqaap qanoq pisariaqartitsiginera apeqqutaalluni.
Foto: Leiff Josefsen
Sisimiuni Maniitsumilu utoqqaat amerlasuut utoqqaat angerlarsimaffiannut nuunnissaminnut utaqqipput. Utaqqisut ilaat utaqqiisaagallartumik napparsimavimmut inissinneqarallartariaqartarput. Tamannalu kommunimut millionerpaalunnik akeqatarpoq.
2024-mi kvartalimi siullermi nalunaarusiaq naapertorlugu Sisimiuni utoqqaat illuannut utaqqisut 22-upput. Maniitsumi 14-it utaqqisut.
Tamanna Qeqqata Kommuniata Sermitsiamut paasissutissiissutigaa.
Napparsimavimmut inissinneqarallarneq 7 millioningajannik akeqartoq
Kommunip aamma paasissutissiissutigaa aningaasartuutit ukiut tallimat kingulliit ingerlaneranni allanngorartuarsimasut.
2018-imi 2019-imilu aningaasartuutit 1,4 aamma 1,5 millionit koruunit akornanniipput, piffissamilu 2020-miit 2022-mut ukiumut 0,3 aamma 0,9 millionit koruunit akornanniillutik. 2023-mi aningaasartuutit 6,9 millionit koruuninut qaffarujussuarput, ukioq mannalu maanna 2 millionit koruuninut killillutik.
- Aningaasartuutit nikinganerata assigiinngitsutaannut peqqutaavoq peqqinnissaqarfiup ullormi ataatsimi uninngasitsinermut 6.000 koruuninik piumasaqarsinnaanera, innuttaasup qanoq immikkut pisariaqartitsinera apeqqutaalluni, Qeqqata Kommuniani Atugarissaarnermut pisortaaneq, Paneeraq Olsen oqarpoq nangillunilu:
- Innuttaasut taamatut immikkut ittumik isumagineqarnissaminnut pisariaqartitsisut amerlanerulersut, tamatumalu kingunerisaanik aningaasartuutit amerliartortut kommunip maluginiarpaa.
Taassuma aamma ilanngullugu eqqaavaa utoqqaat marluk piffissami sivisuumi siorna ukiakkut napparsimavimmi inisseqqagallarsimasut. Aappaa kommunimi utoqqaat illuannut innersuunneqarpoq. Allat aamma qulingiluat piffissami sivikitsumiit qaammatip ataatsip missaani uninngagallarsimapput.
Angerlarsimaffimmi ikiorti
Utoqqaat utoqqaat illuannut nuunneqarnissaminnut utaqqisut utaqqiisaagallartumik iliuuseqarfigineqartarpit.
- Angerlarsimaffimmi ikiortit ulloq unnuarlu angerlarsimaffimmi ikiuinermi nalunaaquttap-akunneri amerlanerusut atorneqarnissaannut akuerisssut, taamaalilluni utoqqaat unnukkut sapaatillu-akunnerisa naanerini ikiorneqarsinnaalernissaat, Paneeraq Olsenip oqaatigaa.
