Video takuuk: Timmisartoq New Yorkimeersoq siulleq Nuummut tikippoq
Nalunaaqutaq 18.45 timmisartoq United Airlinesimeersoq Nuummut tikimmat ammaanersiorluni nalliuttorsiutigineqarpoq.
United Airlinesip timmisartua Nuummut tikissimalerpoq, naatsorsuutigineqartumiit minutsinik qulinik siusinnerusukkut tikilluni.
Foto: Oline Inuusuttoq Olsen
NEW YORK - NUUK
2025-mi juunip 14-ianniit septembarip 24-ata tungaanut United Airlinesip illoqarfiit taakku marluk akornanni timmisartuussisassaaq.
Boeing 737 Max 8 marlunngornerni arfininngornernilu New Yorkimiit Nuummut timmisartuussisassaaq pingasunngornernilu sapaatikkullu Nuummiit New Yorkimut angalasassalluni.
United Airlinesip mittarfik Newark, Manhattanimit 23 kilometerinik kimmut ungasitsigisoq, tikiffigisarpaa.
Kangimut timmisartorneq nalunaaquttap-akunneri sisamat minutsillu 15-it, kitaanullu nalunaaquttap-akunneri sisamat minutsillu 30-t sivisussuseqartassapput.
Ullaakkut Nuummiit timmisartumik aallartoqarsinnaavoq New Yorkimilu suli ullaajusoq tikittoqarsinnaalluni.
Kalaallit Nunaata USA-llu akornanni timmisartuussisoqartalernissaa piviusunngorpoq, United Airlinesimmi timmisartua Boeing 737 Nuummut arfininngornermi unnukkut tikippoq.
Greenland Airports aamma United Airlines timmisartuussisarfissap nutaap ammarneqarnera malunnartinniarlugu mittarfimmi nalliuttorsiortitsisuupput. Sermitsiamit malinnaasut ilisimatitsipput timmisartup tikinneranik malinnaajartortut arlaqartut.
Nuummi innuttaasut arlallit nal. 18.30 missaani Nuup mittarfiata silataani utaqqipput, United Airlinesip timmisartuata tikinnissaa utaqqillugu.
Assi: Morten Okkels
Kalaallit Nunaannit USA-mut timmisartuussisarnerit oqaluttuassartaat Timmisartuussineq nutaaq Kalaallit Nunaat New Yorkillu toqqaannartumik angalaffissatut siullersaavoq. Taamaattoq Kalaallit Nunaat USA-llu akornanni siornatigut timmisartuussisoqartareersimavoq.
SAS-ip Københavnimiit Los Angelesimut sermersuaq qulaallugu timmisartuussineq 1954-imi aallartippaa. Timmisartuussinermi tassani Kangerlussuaq aqqusaarlugu, Canadamut Winnipegimut angalasoqarsinnaavoq.
Air Greenlandip Kangerlussuup aamma USA-p kangiata sineriaani Baltimorep akornanni 2007-imi timmisartuussisalerpoq, aappaaguanili timmisartuussineq taamaatinneqarpoq.
Air Greenland aasaanerani Nuummiit Iqalunnut maanna timmisartuussisarpoq.
