KL

DK

Videoliap akerleriissutaasup eqqartuussivimmi takutinneqarnissaa eqqartuussiviup akueraa

Avatangiisinik illersuiniaq Paul Watson tigummigallarneqaannassanersoq pingasunngorpat Nunatsinni Eqqartuussiviup aalajangissavaa.

Paul Watson suli tigummigallarneqaannassanersoq Nunatsinni Eqqartuussiviup pingasunngorpat aalajangertussaavaa.
Thomas Munk Veirum
Tusagassiortoq
Jensine Berthelsen
Tusagassiortoq
Saqqummersinneqarpoq

Pingasunngornermi ullaap tungaani Nunatta Eqqartuussiviani avatangiisinik illersuiniap Paul Watsonip tigummigallarneqarnera pillugu eqqartuussisoqarpoq.

Eqqartuussinermi Sermitsiaq malinnaavoq, eqqartuussiviullu inaataa mikisuararsuaq ataatsimiinnerup aallartinneraniilli inunnik ulikkaarpoq, amerlanerillu franskisut oqalupput.

Watson tigummigallarneqaannassanersoq eqqartuussiviup aalajangertussaavaa. 2010-mi Sikuiuitsumi kujallermi Japanimiut arfanniutaata aamma Paul Watsonip peqatigiiffigisimasaata Sea Shepherdip illersuiniartuisa aporaannerat pissutigalugu Japanip taassuma tunniunnissaanik qinnutiginninnera oqartussat maanna suliarivaat.

Eqqartuussissuserisut Finn Meinel aamma Jonas Christoffersen Paul Watsonimik illersuisuupput, unnerluussisussaatitaasorlu Mariam Khalil unnerluussisussaatitaasunit sinniisuulluni, eqqartuussisullu siulittaasuat Lars-Christian Sinkbæk eqqartuussinermik ingerlatsisuulluni.

Oqalutseqarnerup killeqarsimanera ajuusaarutigigaa

Kingullermik eqqartuussisoqarnerani oqalutseqarnikkut ajornartorsiuteqarsimaneq pillugu ajuusaaruteqarnermik eqqartuussisut siulittaasuat eqqartuussinermik aallartitsivoq. Ullumikkumut tuluttut oqalutseqartoqarnissaa inissittussaanikuuvoq.

Tamatuma kingorna Watsonip tigummigallarneqarnerata ulluni 28-nik sivitsorneqaqqinnissaa unnerluussisussaatitaasup Mariam Khalilip piumasaraa, Paul Watsonillu pinerlunnermut peqataasimasutut unnerluutigineqarneranut videoliamik pisumik takussutissaasorineqartumik eqqartuussinermi takutitsinissamik siusinnerusukkut eqqartuussiviup itigartitsinera, tassunga atatillugu eqqaavaa.

Paul Watsonilli illersuisuisa tunngaviusumik inatsisip immikkoortua 51 inuillu pisinnaatitaaffii innersuussutigalugit immiussaq uppernarsaatillu allat takuteqqinniarsaraat.

Immiussaq sivikitsuararsuusoq, Watsonillu pisuussuteqannginneranik uppernarsaasuusoq, illersuisut oqarput.

Unnerluussisup Mariam Khalilip videoliap takutinneqarnissaa akerleraa, ilaatigut eqqartuussinermi kingullermi Watson imminut illersornissaminut akuerineqarami minutsini 40-rpassuarni imminut illersornissaminut illersuisuminit akuerineqarsimanera innersuussutigalugu.

Videoliamik takutitsinissaq eqqartuussisup akuerigaa

Nalunaaquttap-akunnerata affaata missaani eqqartuussisoqareermat eqqartuussivimmi siulittaasoq tunuarpoq, eqqartuussivimmi uppernarsaatit saqqummiunneqassanersut eqqarsaatigeqqissaarniarlugu.

Eqqartuussineq nalunaaqutaq 09.40 nanginneqarpoq eqqartuussisullu siulittaasuata Lars-Christian Sinkbækip videoliap takutinneqarsinnaanera oqaatigaa.

Tamanna eqqartuussinermit siulianit allaanerulluinnarpoq, eqqartuussivimmimi videoliap takutinneqarnissaa itigartitsissutaammat.

Immiussamik takutitsinissamik aalajangiineq pissutigalugu unnerluussisussaatitaasoq matup matuneqarnissaanik piumasaqaateqarsimavoq, tamannali eqqartuussisut siulittaasuata eqqarsareerluni itigartitsissutigaa.

Videoliap takutinniarneqarnerani teknikkikkut ajornartorsiuteqartoqalermat eqqartuussineq inimut allamut nuutsinneqartariaqarpoq.

Nuutsitsineq pereermat videoliaq minutsit sisamat sekundillu 30-t missaannik takissusilik takutinneqarmat gummibåd umiarsuup tungaanut ingerlasoq qaartartumillu tippassaammik milorujussisoqartoq takuneqarsinnaavoq.

Illersuisut uppernarsaatinik amerlanerusunik saqqummiusserusupput, itigartinneqarpulli.

Unnerluussisorli naggataarutaasumik oqaaseqarnissaanik akuerineqarpoq, videoliarlu pissutsinut allannguutaanngitsoq tunngavilersuivoq.

Watson: Ajoqusertoqanngilaq

Eqqartuussisup aalajangiinnginnerani Watson oqaaseqarnissaminik akuerisaavoq. Qaartartunik tippassaatinik arfanniummut milorujussinermi ajoqusertoqarsimanngitsoq, Watsonip oqaatigaa.

- Japanimiut malersorpaatigut. Umiarsuaataat sukkanerupput. TV-kkut aallakaatitassiat pissutigalugit kamaatiginnikkamik akiniarniarpaatigut, Paul Watson eqqartuussivimmi oqarpoq.

Eqqartuussisoq: Tigummigallarneqarneq atuutsinneqaannassaaq

Paul Watsonip tigummigallarneqarnera oktobarip aappaata tungaanut sivitsorneqartoq, nalunaaqutaq 10.52 eqqartuussisoq Lars-Christian Sinkbæk aalajangerpoq.

Illersuisut aalajangiineq ingerlaannaq Nunatta Eqqartuussivianut suliassanngortippaat, tassanilu apeqqut aalajangiiffigineqaqqissaaq.

Eqqartuussineq taamaalilluni naammassivoq, Paul Watsonilu Nuummi pineqaatissinneqarsimasunut inissiisarfimmut uterpoq suliallu suliareqqinneqarnissaa utaqqisussanngorpaa.

paul watson sea shepherd eqqartuussiviani illersuisut inuiaqatigiit japanimiut nuuk

ATORFIIT Se alle jobs

Powered by Labrador CMS