Vivian: Issittoq pillugu USA-p periusissiaa nutaaq qiimmaallannarpoq
Nunanut allanut tunngasunut naalakkersuisup Vivian Motzfeldtip USA-p Issittumi illersornissamut periusissiaa nutaaq ataasinngornermi juulip 22-ani saqqummiunneqartoq arlalitsigut isumalluarfigaa.
- Issittumi illersornissamut politikkimut tunngatillugu ataatsimut anguniagaqarnitta qanoq qulakkeerneqarnissaa pillugu USA-mik Danmarkimillu oqaloqateqarnerulernissarput periusissiaq nutaaq tunngavigalugu qilanaaraara, Vivian Motzfeldt oqarpoq.
Leiff Josefsen
Issittup taamalu Kalaallit Nunaata inissisimaffiata skkulersorfiunnginnera pingaaruteqartoq, Naalakkersuisut isumaqarput.
- USA-p, Kalaallit Nunaata Danmarkillu Issittumi illersornissaq pillugu oqaloqatigiittarneranik nukittorsarnissamut USA-p Issittumi illersornissamut periusissiamik nutaamik saqqummiussinera tunngavissiivoq. Naalakkersuisut sakkulersorfiunngitsuunissamik anguniagaat eqqarsaatigalugu, periusissiami eqqissinermik patajaatsuunermillu ukkataqarnissaq suleqatigiinnerup nukittorsarneqarnissaanut tunngavissaalluartutut isigaara. USA-p illersornissaanut Kalaallit Nunaat aalajangiisuulluinnarpoq, taamaattumillu Issittumi sillimaniarnermut politikkimik ineriartortitsinermut illersornissamut periusissiamik anguniagaqarnitta avitseqatigiissutiginissaa pingaaruteqarpoq, Naalagaaffinngornissamut Nunanullu Allanut Naalakkersuisoq Vivian Motzfeldt Sermitsiaq.AG-mut oqarpoq.
USA-p periusissiaa ataasinngormat saqqummiunneqarpoq, tamannalu tamakkiisoq uani atuarneqarsinnaavoq.
Nunat inoqqaavi
„Issittumik paasinninnissamut Issittumi nunat inoqqaavisa ilisimasaallu periusissiami pingaartinneqarnerat qiimmaallaatigaara", Vivian Motzfeldt oqarpoq.
- Tamatumunnga atatillugu nunap inoqqaavisa kattuffiinik niuernermillu ingerlatsivinnik suleqateqarnerup nukittorsarnissaa USA-p illersornissamut ministereqarfiata anguniarpaa, naalakkersuisoq oqarpoq nangillunilu:
- Nalunngilara amerikami sakkutooqarnermut atatillugu Alaskami inuit sakkutuujunngitsunut isumaqatigiissutit amerlanerpaartaat pissarsiareersimagaat. Issittumi sakkutooqarnerup sakkutuujunngitsunut iluaqutaanissaa qulakkeerniarlugu, Kalaallit Nunaanni aamma taamaaliornissarput pingaaruteqarpoq.
Nakkutilliineq annertunerusoq
Amerikamiut periusissiaat ilaatigut annertunerusumik nakkutilliinermik tunngaveqarpoq, tamannalu Naalakkersuisut periusissiaannut naapertuuppoq, tassungalu atatillugu Vivian Motzfeldtip USA-mik oqaloqateqarnerulernissaq qilanaaraa.
- Nakkutilliinerup pitsanngorsarneqarnissaa periusissiami sammineqarpoq, tamannalu Nunanut Allanut, Sillimaniarnermut Illersornissamullu Kalaallit Nunaata Politikkiani aamma suliniutigineqarnissaa pingaartinneqangaarpoq. Ilaatigut illersornissamut isumaqatigiissutip atuunnerani Issittumut Atlantikullu avannaanut dronenik ungasissumut ingerlasartunik pisinikkut Kunngeqarfiup anguniagaq tapersersorpaa. Periusissiap nutaap saqqummiunneqarnera tunngavigalugu siunissami qanoq issittumi illersornissamut politikkimik ataatsimoorussamik anguniagaqarsinnaanerput pillugu USA-mik Danmarkimillu oqaloqateqarnerulernissatsinnut qilanaarpunga, Vivian Motzfeldt oqarpoq.
Russit qisuariaataat
USA-p periusissiaa tamanut saqqummiunneqarmat nuna sorsuttoq Rusland ingerlaannaq qisuariarpoq.
- Periusissiami tassani Issittumi pissutsit ilungersunarnerulersinnissaat siunertaavoq, Ruslandip nunanut allanut ministereqarfiani oqaaseqartartoq Maria Zakharova, Ritzau naapertorlugu pingasunngormat oqarpoq.
Ulloq taanna sioqqullugu Kremlip oqaaseqartartuata Dmitry Peskovip oqaatigaa periusissiami nutaami „aporaanneq“ USA-mit sammineqartoq, Reuters allappoq.
Ruslandip saniatigut issittumi naalagaaffiit tassaapput USA, Canada, Danmark, Norge, Sverige, Island Finlandilu.
