KALAALLIT NUNAAT/FRANKRIG
Vivian: Maanna suleqatigiinneq timitalersorneqassaaq
- Kalaallit Nunaanniit nunat allat suleqatigineranni amerlasuutigut misigisarparpiut pitsaalluinnartunik tunngavilinnik suleqatigiissusiortoqartarnera, amerlasuutigulli oqaatsinik kusanartunik timitalersorniaruminaatsinneqartunillu tunngaveqartarput. Kisianni maanna Frankrigimik suleqateqarnerput piumassuseqaqatigiilluta inerisagarput tigussaasunngortinneqarluni ingerlanneqarpoq isumannaatsumik, nunanut allanut tunngasunut Naalakkersuisoq, Vivian Motzfeldt (S) oqarpoq.
Allat tamarmik Nuummiit Nuummullu arfininngornermi taamaatippaat, kisianni Jean-Noël Barrot-ip Kalaallit Nunaannukarnissani aalajangiusimavaa, taamaattumik atorfilittani peqatigalugit sila pitsaanngitsoq ajugaaffigaa, taamaalillunilu pilersaarutini malillugu sapaatip akunnerata naanerani tikeraarnissani piviusunngortippaa. Assimi takuneqarsinnaavoq nunanut allanut tunngasunut Naalakkersuisoqatini peqatigalugit Kalaallit Nunaata Frankrigillu akornanni pissutsit pillugit nutaarsiassat kingulliit saqqummiukkaat ullup qeqqata siornatigut tusagassiortunik katersortitsinermi.
Assiliisoq: Jensine Berthelsen
Nunanut allanut tunngasunut Naalakkersuisoq, Vivian Motzfeldt, naammagisimaarinnilluarpoq Kalaallit Nunaata Frankrigillu akornanni ineriartorneq pillugu:
- Toqqissisimanarpoq Frankrigip Kalaallit Nunaat Kunngeqarfillu peqatigalugit suleqatigiinnissamut piumassuseqarluarnera. Tassanilu qularutissaanngilaq piumassuseq tamanna Frankrigip ilungersuutigigaa.
- Oqaluttuarisaanermi aamma takusinnaavarput suleqatigiinnerput pitsaasuusimasoq, pingaartumik ilisimatusarnermi, tassanilu franskit ilisimatuut immikkut ittut soorlu Paul-Émile Victor aamma Jean Malaurie, annertuumik ilisimasaqalersitsisimasut Issittumi silap pissusaa pillugu aammalu naggueqatigiit Inuit inuuniarnikkut atugarisaat pillugit.
- Maanna siunissaq siunnerfigaarput pitsaasumik suleqatigiinnikkut, nunanut allanut tunngasunut Naalakkersuisoq, Vivian Motzfeldt Sermitsiamut oqarpoq.
Kalaallit Nunaata ineriartorneranut Frankrig tapersersuiniarpoq
Vivian Motzfeldtip oqaatigaa ukiut ingerlanerini nunanit allanit suleqatigiinnissamut piumassuseqartoqartarsimasoq nunatsinnit misigineqartaannartoq, kisianni aamma ilanngullugu oqaatigivaa piumassuseq tamanna amerlasuutigut suleqatigiinnissamut oqaatsit kusanartut atorlugit isumaqatigiissusiornerit timitalerniaruminaatsittarsimasut. Kisianni franskinik attaveqarneq maanna ingerlanneqartoq allaaneruvoq, tassami Frankrigip Kalaallit Nunaat peqatigalugu suleqatigiinnissamut piumassuseqarluarnini takutippaa:
- Frankrigip ersarissumik takutippaa suleqatiginnikkusussuseqarlunilu ikinngutigiilluarusussuseqarluni, ikiuukkusussuseqarlunilu, aammalu Præsident Macronip tikeraarnerata kingorna, maanna aallartipparput suleqatigiissutigisassagut siunissami qanoq ittuussanersut piareersarneqarnissaat. Tamanna siullermik atorfilittatigut suliarineqassaaq piaartumillu atsiorneqarluni.
- Isumaqatigiissutigaarput atorfilittatigut piareersarluni sulineq sukkasuumik ingerlanneqassasoq, taamaalilluta suleqatigiissutigisartakkatta piviusunngortinnissaat killiffigisinnaaniassagatsigu.
Taamaakkaluartoq ilisimaneqareersutut Frankrigip generalkonsulissaanik pilersitsisoqarnissaa pilersaarutaavoq, Præsident Emmanuel Macronip juunimi tikeraarnermini nunamini naalakkersuinikkut atorfilittaminut peqqussutaa malillugu piareersarlugu ingerlanneqaleruttorpoq.
Naallu massa suleqatigiissutissaq nutaaq atsioriaannanngorlugu suli inissinneqanngikkaluartoq Frankrigip nunanut allanut ministeriata oqaatigaa pingaarnertut anguniarneqartoq tassaasoq Kalaallit Nunaannut Kunngeqarfimmullu tapersersuineq, aammalu attaveqaqatigiinnikkut, silap pissusiata allanngoriartorneranut, aatsitassarsiornermut, minnerunngitsumillu illersornissamut NATO aqqutigalugu nunat akornanni Frankrig peqataarusuttoq.
Issittumi sungiusarnerit aallartinneqarput nunat issittortaqanngitsut peqataallutik
Vivian Motzfeldtip erseqqissaatigaa Kalaallit Nunaata kissaatigisimagaa nunat issittumiinngikkaluartut iligisalli Kalaallit Nunaanni aammalu Issittup sinnerani sungiusarnissamut periarfissinneqarnissaat.
- Issittumi eqqissinartumik sakkulersorfiunngitsumillu ingerlatsisoqassasoq piumasaraarput, taamaakkaluartoq piviusuuvoq piffissami nalorninartumi inuugatta, sumiiffinni assigiinngitsuni saassussisoqartarluni sorsuttoqartarlunilu. Kisianni aamma silap pissusiata allanngoriartornera annertusiartorpoq, imaatigut aqqutissat nutaat ammarneqarlutik minnerunngitsumillu pinngortitap pisuussutai annertuut tikikkuminarsiartuinnarlutik, taakkulu illersorneqartariaqarput issittormiunullu iluaqutaasussanngorlugit atorluarneqarnissaannut aqqutissiuussisariaqarpugut.
- Taamaattumik aamma ilaatigut Kalaallit Nunaanniit piumasaraarput Kalaallit Nunaata illersorneqarnissaa pillugu aaqqiissutissamik piviusorsiortumik ingerlatsisoqarnissaa, taamaalilluta nunamit ataasiinnarmit illersorneqarnissamik isumalluuteqassanngitsugut, taamaattumik illersornissap tungaatigut nunat iligut suleqatigullu peqataasariaqarput, Frankrigip aamma nunatut suleqatitut tamanna piareersimaffigaa.
Vivian Motzfeldt innersuussivoq nunat NATO-mi ilaasortat arlallissuit issittortaqanngitsut, taamaattumillu piginnaasaat issittumi pinngortitap silallu pissusianut naleqqussarneqarsimanngitsut.
- Taamaattumik suleqativut ilivullu issittortaqanngikkaluartut aamma issittumi sungiusarnissaminnut periarfissaqartariaqarput, taanna oqarpoq.
Issittumi ataatsimeersuarneq angisooq pingajalerpoq
Vivian Motzfeldt Frankrigimik suleqateqarnerup inerisarneqarneranut ulapputeqaannanngilaq.
Nunanummi allanut tunngasunut Naalakkersuisoq oqaluttuarpoq Kalaallit Nunaat aamma Kunngeqarfik sinnerlugu Danmarkimik peqateqarluni nunat issittumik sineriattallit ataatsimeersuarnissaanik Nuummi pisussamik piareersaaleruttortut, nunat pineqartut tassaapput Canada, Finland, Island, Norge, Rusland, Sverige, USA aamma Danmark, Savalimmiut aamma Kalaallit Nunaat.
Motzfeldt paasissutissiivoq ataatsimeersuarnermi tassani aamma oqaluuserineqassasoq Issittumi isumannaallisaaneq illersorneqarnissarlu.
Ataatsimeersuarnissamut tunngasunik Sermitsiaq paasissutissanik sukumiisumik suli pissarsisimanngilaq, kisianni Motzfeldt-ip uppernarsarpaa septembarimi tamanna nunatsinni ingerlanneqartussaasoq.
