Vivian Motzfeldt: Naatsorsuutigaarput naalagaaffiit akornanni malittarisassat malinneqartut

Danmarks Radio-p paasissutissanik Amerikamiut sunniiniarnermik suliniuteqarsimanerannik pissarsisimaneranut tunngatillugu,  nunanut allanut tunngasunut naalakkersuisumut, Vivian Motzfeldt (S), ernumassuteqalersitsinngilaq:

- Paasissutissat maanna ilisimalersimasakka naapertorlugit, nunatsinni innuttaasut inatsisinik unioqqutitsilluni sunnerniarneqarsimarannik takutitsisunik uppernarsaatinik takusaqanngilanga. Allatut oqaatigalugu, saqqummiunneqartut nutaarsiassaanngillat, siornatigut ilisimasaqarfigisatsinnit allaanerunngillat.

Tassa sunniiniarnermik suliniuteqartoq takussutissaqanngilaq?

- Taamaattunik suliaqartoqarneranik uppernarsaatinik peqanngilanga, siornatigullu taamaattoqarsimasinnaanera tusarsimanngilara, taamaattumik pineqartoq pillugu qanoq qisuariarnissaq ajornakusoorpoq. Kisianni assersuutigalugu killeqarfinnik ataqqinnittussaanermik malittarisassat unioqqutitsisoqarsimaneranik  uppernarsaatinik saqqummiussisoqassappat, taava tassanngaanniit suliamik aallartitsissaagut, kisianni maannamut uppernarsaatinik takusaqarsimanngilanga, Vivian Motzfeldt akivoq nangillunilu:

- Kisianni isumaqarpunga suleqatigiinnerput tatigeqatigiinnermik ataqqeqatigiinnermillu tunngaveqartoq, tamannalu atuuppoq nunat tamalaat suleqatigisartakkavut tamaasa eqqarsaatigalugit, aamma USA-mut tamanna tunngavoq.

Kisiannimi, ilumut pisortat avaqqullugit sunniiniarnermik pisoqarsimappat innuttaasut sunnerniarlugit, taava qanoq iliuuseqassavisi?

- Uteqqissavara, taamaassorinninnerit uppernarsaatitaqanngitsut oqaaseqarfiginissaat oqaaseqarfigiuminaatsippara. Nalunngilarput oqaloqatigiinnerit suleqatigiinnerillu assigiinngitsut ingerlanneqartut, naluara qanoq pisoqaraangat sunniiniarnertut taaneqarsinnaalertarnersut. Uagut suleqatigisartakkavullu naalagaaffinni naalakkersuinikkut demokratii tunngavigalugu ingerlavugut, tassanilu kikkulluunniit  naapissinnaapput, isummanik paarlaateqatigiillutik suleqatigiillutillu. Pisuni malittarisassat nalinginnaasut avaqqullugit pisoqarpat, taava nutaamik inissisimalissaagut, tamannalu tunngavigalugu nutaamik nalilersiuissaagut iliuuseqarlutalu.

- Kikkulluunniit imaaliallaannaq sunnersinnaanngilaatigut

Vivian Motzfeldt naqissusiivoq, Kalaallit Nunaanni innuttaasut imaaliallaannaq allamik isumaqalersinniarlugit sunnerneqarnavianngitsut, namminneq isummaminnik erseqqissumik nittarsaassereermata:

- Uannut pingaaruteqarpoq naqissuserusullugu, Kalaallit Nunaanniit ersarissumik oqariartuutigisimagipput, tassa nunarput naalagaaffiup allap ataaniilersinneqarnissaa kissaatiginngilluinnaripput. Nalunngilarput qanoq inoorusunnerluta, nalunngilarput nunarput qanoq kinguaassatsinnut ingerlateqqikkusunnerlutigu, tamannalu ersarissumik ataatsimoorluta oqaatigisimavarput, taamaattumik kikkulluunniit isumaqarunik uagut imaaliallaannaq nutaamik isumataartissinnaalluta, taava nalunngittariaqarpaat uagut ataatsimoorluta isummernerput aalaqqajuttuunngitsoq.

Kisianni kalaallit innuttaasa isumaat allanngortinniarlugu sulisoqarpat, Naalakkersuisut qanoq iliuuseqarnissamut pilersaarummik piareersimatitaqarpat?

- Siullermik pingaarnerpaamillu kalaallit inuiaqatigiinnut ataqqinninneq pingaaruteqarpoq, tamannalu naatsorsuutigaarput malinneqassasoq, minnerunngitsumik nunanit suleqatitsinnit. Aappattut, tamatigut suleqatigiissutigineqartut tatigeqatigiinnermik ataqqeqatigiinnermillu ingerlanneqarnissaat naatsorsuutigaarput, aamma suleqatigiissutigineqartut tamarmik illuatungeriinnut iluaqutaasarnissaat naatsorsuutigaarput.

Kalaallit uppertikkumiartuunngillat

- Assersuutigalugu upernaaq manna nunarsuarmut takutipparput nunarput pillugu qanoq ataatsimoortiginersugut aammalu ataatsimoorluta qanoq nukittutiginersugut. Inuiassuit nalunngilaat nunarput pillugu ataatsimoortugut, ataatsimoornerpullu imaaliallaannaq sanngiillisarneqarsinnaanngitsoq. Qularutiginngilara naapertuutinngitsumik, aammalu nunat tamalaat akornanni ileqqorissaarnissamut unioqqutitsisoqalissagaluarpat, ataatsimoorluta nikussaaqqissasugut.

USA-p suleqatiginerata, tassa pisortatigoortumik suleqatigiinnerup saniatigut, anngiortumik nerriviullu ataatigut sulisoqarpat, suleqatiginneq sunnerneqassava?

- Tamanna eqqoriaanermik aallaaveqartillugu oqaaseqarfigisinnaanngilara, aammalu oqaatigerikkattut paasissutissanik imaluunniit uppernarsaatinik muminganik takutitsisunik peqanngilanga pissusissamisuunngitsumik ingerlatsisoqarsimasinnaaneranik. Nunat allat suleqatigalugit, USA ilanngullugu isumaqatigiissutit naapertorlugit ingerlappagut. Kisianni allatut pisoqarsimassappat, uppernarsaatinik amigaateqarpunga qanoq iliornissatsinnut qanorlu akissuteqartariaqarnitsinnut tunngavissaqassappat qisuariarumaarpugut.

Nunanut allanut tunngasunut Naalakkersuisoq, Vivian Motzfeldt naggasiullugu innersuussivoq nunat tamalaat maleruagassaat, nunat killeqarfiinik ataqqinninnermik piumasaqaateqartoq, Kalaallit Nunaata nammineq siunissami qanoq aalajangiinissaminut pisinnaatitaaffia, inuit pisinnaatitaaffiinik ataqqinninnittoqartussaavoq tamannalu Naalakkersuisut naatsorsuutigigaat, tassalu tatigeqatigiinnermik ataqqeqatigiinnermillu tunngaveqarluni suleqatigiinneq ingerlanneqassasoq.