Vivian Motzfeldt (S): - Nunarput nunanik allanik suleqateqarnermi meeqqatut pineqarunnaassaaq
Nunanut allanut tunngasunut Naalakkersuisoq, Vivian Motzfeldt (S) naammagisimaarinnippoq Savalimmiuni attaveqatigiinnermut ataatsimiititaliap ataatsimiinnerani angusat pillugit. - Sivisuumik nunatsinnit kissaatiginikuuarput nunanik allanik taakkulu sinniisuinik illugiilluta (bilateral) nammineerluta suleqateqarsinnaanissarput, maannalu nunanut allanut tunngatillugu meeqqatut pineqartarnerput qaangiuppoq, taanna Sermitsiamut oqarpoq.
- Nunatsinnut soqutiginninneq annertooq aallaavigalugu, aammalu nammineerluta avatitsinniittunik naapitsisinnaanissatsinnut periarfissarissaarnerulernerput tunngavigalugu, pisariaqartipparput nunanut allanut tunngasunut naalakkersuisoqarfiup annertusarnissaa piffissamullu naleqqussarneqarnissaa, taamaammat anguniarpara 2026-mi aningaasanut inatsisissaq aqqutigalugu aningaasaliissuteqarnissarput, nunanut allanut tunngasunut Naalakkersuisoq, Vivian Motzfeldt (S) oqarpoq.
Assiliisoq: Oscar Scott Carl
Sapaatip akunnerani matumani marlunngormat Danmarkimi, Kalaallit Nunaanni Savalimmiunilu nunanut allanut, isumannaallisaanermut illersornissamullu politikkikkut attaveqatigiinnermut ataatsimiititaliaq Savalimmiuni ataatsimiippoq.
Tassani nunanut allanut Naalakkersuisoq, Vivian Motzfeldt nunarput sinnerlugu kingumut piumasaqarpoq nunatta nammineernerulluni nunanik allanik illugiilluni suleqateqarsinnaanerminik annertusaaffigineqassasoq, tamatumuunalu nunatta piumasaqaataa tusaaneqarpoq:
- Sivisuumik nunatsinnit kissaatigaarput nunarput nammineq imminut sinnerluni soqutigisani angorusutanilu pillugit nunanik allanik naapitaqarnermini qallunaanit peqateqarnani nammineq ingerlattassagai, taamaalillutalu Danmarkimit meeqqatut pineqarunnaassasugut, nunat suleqatiginnikkusuttut suleqatigerusutagullu illugalugit (bilateral) naapissagaangatsigit, Vivian Motzfeldt oqarpoq nangillunilu:
- Maanna nammineerluta kissaatigut malillugit iliuuseqarsinnaalernerput, alloriarneruvoq pitsaasoq, tamannalu naammagisimaarpara.
Danmarki isumaqatigiinniarnerni peqataasassaaq
Kunngeqarfik inatsisit maleruagassallu malillugit aqunneqarpoq, pingaartumik tunngaviusumik inatsit aammalu Kalaallit Nunaannut tunngatillugu namminersornermut inatsit aallaavigalugit.
Vivian Motzfeldt innersuussivoq inatsisitigut aalajangersarneqarsimanngitsoq qanoq nunat allat suleqatiginerini qanoq iluseqartumik najoqqutassiaqanngitsoq maleqqissaarneqartussamik. Taamaattumik Kalaallit Nunaata Danmarkimik peqateqartariaqarnera nunanut allanut politikkikkut attaveqaatinut tunngatillugu, annertuumik killilersimaarneqarsimasutut misinnartoq:
- Aamma naammagisimaarpara akunnitsinni tatigeqatigiinneq alloriarneq aqqutigalugu nukittorsarneqarmat. Inersimasuuvugummi nalunngilarpullu periarfissat killilersuutillu suut tunngavigalugit sulissanerluta, nalunngilarpullu inatsisit malinneqartussaasut, Vivian Motzfeldt naqissusiivoq nangillunilu:
- Alloriarneq angusarput isumaqarpoq kikkulluunniit uagutsinnik illugiinnermik tunngavilimmik naapitsiumasut uagullu naapikkusuttakkatsinnik naapitsisinnaanngortugut. Naapinnerit tamakku isumaqatigiinniarnernik kinguneqassappata, taava Danmarki peqataatinneqassaaq, tamannalu inatsisit atuuttut naapertorlugit pisassaaq.
Nunanut allanut suliassaqarfik annertusarneqassaaq
Kalaallit Nunaat ukiut qulikkaat matuma siornatigut nunat amerlasuut akornanni ilisimaneqanngilaq pingaaruteqanngitsutullu inissisimanikuuvoq.
Nunarsuarmili silap pissusaa pillugu ajornartorsiuteqarnerup, nunarsuarmi kiatsikkiartornerata kingunerisaanik Issittumi sikup aakkiartornera ilutigalugu, nunami maani "sikuiuitsoq" taaneqartarnikuugaluartoq aakkiartormat, nunat tamalaat soqutigilluinnagaannik imaatigut aqqutit nutaat pilersinneqarput, tamatumalu malitsigisaanik Kalaallit Nunaat nunarsuarmi maluginiarneqarnerulerpoq.
Taamatuttaaq aggustip 18-iani 2019,-mili Amerikami præsidentip, Donald Trumpip Kalaallit Nunaat pisiarerullugu siullermeerluni oqariartuutigimmagu, nunarput piumanngikkaluaraanniluunniit annertoorujussuarmik maluginiarneqalerpoq ilisimaneqalerlunilu.
- Soqutigineqarnerujussuaq Kalaallit Nunaanni innuttaasunut iluaqutaasariaqartoq isumaqarpugut, tamannalu anguniarlugu ullut tamaasa sulissutigaarput. Maanna aamma nammineerluta nunat tamalaat akornanni illugiilluni suliassani periarfissaqarnerulerpugut.
- Tamatuma malitsigisaanik piareersartariaqarpugut, isumaqarpungalu nunanut allanut naalakkersuisoqarfipput ineriartornermut malinnaasariaqartoq. Taamaattumik sulissutigaara siunnersuusiornissaq qanoq ililluta nunat tamalaat pillugit suliassat iluini piginnaasat naleqquttut qulakkeersinnaanerivut, pingaartumik aningaasanut inatsisissaq pillugu isumaqatigiinniarnerni, Nunanut allanut Naalakkersuisoq, Vivian Motzfeldt (S) oqarpoq.
