Vivian Motzfeldt sinniisoqarfinnilu pisortassanik nutaanik toqqaasoq
Nunanut allanut tunngasunut naalakkersuisup nunanut allanut sinniisussat misilittagaqarluartut nunanit tamalaanit malinnaavigilluarneqarnerup pileruttornerani toqqarpai.
- Kalaallit Nunaat nunarsuarmioqatigiinni ukkatarineqartorujussuuvoq, piffissamilu aggersumi suliassanik pingaarutilinnik periarfissanillu suliassaqarpugut, Vivian Motzfeldt oqarpoq.
Assi: Oscar Scott Carl
Nunanut allanut ilisimatusarnermullu naalakkersuisup Vivian Motzfeldtip kikkut Kalaallit Nunaata nunani allani sinniisoqarfiini ukiuni tulliuttuni siuttutut inissisimassanersut maanna toqqarpai.
Sinniisoqarfinni pisortanngortussat Kalaallit Nunaata nunarsuarmioqatigiinni soqutigisaat aammalu Kalaallit Nunaata suleqatigisaatinik qanimut patajaatsumillu oqaloqatigiinnissanut qitiusumik inissisimasuussapput.
SINNIISOQARFINI PISORTAT NUTAAT
- Jacob Isbosethsen Washington D.C.-mi sinniisoqarfimmi juulip aallaqqaataaniit 2025 pisortaalissaaq.
- Washington D.C.-mi atorfik Kenneth Høeghip apriilip tungaanut atorfigaa, taannali Kunngeqarfik Danmarki sinnerlugu Issittoq pillugu Aallartitatut atorfinittussanngorami Kalaallit Nunaannukarpoq.
- Tove Søvndahl Gant Bruxellesimi sinniisoqarfimmi septemberip aallaqqaataani 2025-mi pisortanngussaaq. Tove Søvndahl Gant Reykjavikimi sinniisoqarfimmi maanna pisortaavoq.
- Bruxellesimi sinniisoqarfimmi Inuuteq Holm Olsen 2021-miilli pisortatut inissisimavoq. Inuuteq Holm Olsen Nuummut juulip 31-ni 2025-mi angerlartussanngussaaq, Issittumi Siunnersuisooqatigiit Siulittaasoqarfianni suleqataalissagami.
- Karsten Peter Jensen Reykjavikimi sinniisoqarfimmi septemberip aallaqqaataani 2025-mi pisortanngussaaq. Karsten Peter Jensen maanna Nunanut Allanut Ilisimatusarnermullu Naalakkersuisoqarfimmi siunnersortaanertut inissisimavoq.
- Beijingimi sinniisoqarfimmi pisortatut atorfik inuttassarsiuunneqassaaq, ukioq mannalu kingusinnerusukkut toqqaasoqarumaarluni.
Naalakkersuisut tusagassiorfinnut nalunaarummi ilisimatitsipput.
- Kalaallit Nunaat nunarsuarmioqatigiinni ukkatarineqartorujussuuvoq, piffissamilu aggersumi suliassanik pingaarutilinnik periarfissanillu suliassaqarpugut. Suliassaqarfinnut nukittuunik sulisussaqaratta tanngassimaarutigaara, taakkulu pikkorilluinnarlutik akuutitsillutillu Kalaallit Nunaata soqutigisaannik Kalaallit Nunaannut sinniisorissavavut.
- Ilutigaluguttaa nuannaarutigalugu oqaatigissavara angerlartitsinitsigut Issittumi Siunnersuisooqatigiinni siulittaasuuffeqarnitsinni sulinissamut nukittorsaasinnaagatta. Qularinngilluinnarpara sinniisoqarfimmi pisortassatut toqqarneqartut Kalaallit Nunaannut iluaqutaasumik piumassuseqarluarlutik pitsaassutsimillu pigisaqarlutik Kalaallit Nunaannut iluaqutaajumaartut, Vivian Motzfeldt tusagassiorfinnut nalunaarummi oqarpoq.
Sinniisoqarfiit pisortaat ilaat allanngortinneqassapput, taamatullu pisortaq siunnersortaasoq ilanngunneqarluni.
