Vivian Motzfeldtip António Guterres naapippaa
Nunanut allanut Ilisimatusarnermullu Naalakkersuisup Vivian Motzfeldtip nunanut allanut ministeri Lars Løkke Rasmussen Savalimmiullu nunanut allanut ministeriat Sigrid Stenberg peqatigalugit Naalagaaffiit Peqatigiiffiata generalsekretæria António Guterres naapippaat.
Marlunngornermi New Yorkimi nunanut allanut ilisimatusarnermullu Naalakkersuisoq, Vivian Motzfeldt (S) aamma FN-ip pisortaanera António Guterres ataatsimeeqatigiipput FN-ip ataatsimeersuarnerata ammarneqarneranut atatillugu.
Asseq: Naalakkersuisut
Nunarsuarmi pissaaneqarnerpaap, USA-p FN-mut, nunarsuarmi nunat tamalaat suleqatigiinnissaannik eqqissisimasumillu peqatigiinnissaannik suliniuteqartumut, attaveqarnera allanngorartuupilussuuvoq.
Donald Trumpip præsidentitut siullermeerluni atuuffimmini USA FN-ip suleqatigiiffiinit pingaarutilinnit anisippaa, assersuutigiinnarlugu nunarsuarmi peqqissutsimut kattuffissuarmit WHO-mit, FN-ip inuit pisinnaatitaaffiinut kattuffianit UNHRC-mit aammalu UNESCO-mit minnerunngitsumillu Parisimi isumaqatigiissummit anisinnikuuaa. Tamatuma saniatigut USA-p FN-ip aningaasaqarneranut tapersersuinera annertuumik ikilisarneqarpoq.
Joe Bidenip nalaani USA-p FN-imut peqataatitaanera nalinginnaasumik ingerlateqqinneqalerpoq, maannali Trumpip præsidentitut aappassaanik atuuffimmini aallartinnerata kingorna, USA-p FN-imut peqataatitaanera malunnaatilimmik annikillisarneqaqqilerluni.
Kalaallit Nunaata FN-imut tapersersuineranik Vivian ersersitsivoq
- Naalagaaffiit Peqatigiiffiata generalsekreæriata
António Guterresip sivikitsumik naapinnera nuannaarutigaara. Piffissami
nunarsuarmioqatigiit nutaamik inissisimanerannik sungiussiniarfigisatsinni,
namminerlu nunatta nunarsuarmit sammineqarfigisaani, inissisimaffitsinnik
oqaluttuarnissaq pingaaruteqarpoq.
- Naapitsinitsinnilu
Naalagaaffiit Peqatigiiffiata nunat tamat akornanni sulinerata attanneqarnissaa,
aatsaallu taama pingaaruteqartigilernera Naalagaaffiit Peqatigiiffiannut
generalsekretærimullu tapersiinerput takutipparput, Vivian Motzfeldt oqarpoq.
Generalsekretæri Kalaallit Nunaannut tikeraarsarpaa
Nunanut allanut Naalakkersuisup Vivian Motzfeldtip
Naalagaaffiit Peqatigiiffiata generalsekretæria Kalaallit Nunaannut
tikeraarsarpaa, sukkulluunniit nunatsinnut tikeraarnissaanut tikilluaqqusaanera
oqaatigalugu.
– Nunarsuarput allanngorpoq, Kalaallillu Nunaanni immikkoortuni
amerlasuuni annertuumik ineriartorneq malugaarput, taamaammallu
generalsekretærip, nunarsuarmi nunarsuarmioqatigiit kattuffissuisa annersaanni
siuttuusup, nunatsinni innuttaasunik naapitsilluni, nunatsinnik
pinngortitamillu takunnilluni, Issittumi silap pissusaata
allanngoriartorneranik maluginninnissaa, taamaalillunilu peqatigaluta nammineq
isiminik takunninnissaa pingaaruteqarpoq, Vivian Motzfeldt oqarpoq.
