Kalaallit Nunaanni Eqqartuussiviit sapaatip
akunnerata siuliani pingasunngornermi avatangiisinit pillugit
ilungersuussaqartoq Paul Watson, Pineqaatissinneqarsimasunut
inissiisarfimmiiginnassanersoq aalajangermat, tassunga iluaqutaasunik
pitsanngoriaateqalaartoqarpoq.
Kalaallit Nunaanni Eqqartuussiviit sapaatip
akunnerata siuliani pingasunngornermi avatangiisinit pillugit
ilungersuussaqartoq Paul Watson, Pineqaatissinneqarsimasunut
inissiisarfimmiiginnassanersoq aalajangermat, tassunga iluaqutaasunik
pitsanngoriaateqalaartoqarpoq.
Siullermik Watson saviminernik
paffequteqarani eqqartuussiviup silataani nuivoq. Akerlianik sapaatip
akunnerata siuliani aggustip 15-anni eqqartuussisoqarnerani, Paul Watson
politiit biiliinit niunermini saviminernik paffequteqarnermini assani
tunuleralugit nipituumik nimaartoq filmiliarineqarsimasoq internetikkut
siammarterneqarpoq.
Aappaattut eqqartuussivik 4-ami maanna
piginnaasumik oqalutseqarpoq, siuliani taamaattoqanngilaq. Tassanimi Watsonip
illersuisua, Julia Stage, sullissaminut qallunaatuumit tuluttuumut
nutserisariaqarsimavoq, tamannalu naammaginanngilaq. Pingasunngormat siuliani
eqqartuussinerup aallartinnerani eqqartuussisut siulittaasuat, Lars-Christian
Sinbæk, oqalutseqannginnera pillugu ajuusaaruteqarpoq.
Pingajuattut Paul Watsonip illersuisui,
Jonas Christoffersen aamma nunatsinni illersuisuuneq Finn Meinel, takutitsinissaminnut
akuerineqarput, videoliaq kingullermilli takutikkusutaat. Taamaattorli
eqqartuussisup videonik allanik takutitsisoqarnissaanut itigartitsivoq,
taamaattumillu Japanimiut umiarsuaanni arfanniummi videoliaq, qaartartumik
tipiliortumik angallammit avatangiisinik illersuinianeersunit Japanimiut
arfanniarnerannut akerliusunit qaartinneqartoq takutinneqarpoq. Qaartartoq
taanna tipiliortartoq – Japanimit oqaatigineqartoq naapertorlugu – inuttat
ilaata ajoquserneranik kinguneqartitsivoq. Kisianni videop allap,
avatangiisinik illersuiniat angallataannit immiussap – illersuisut oqarnerat
naapertorlugu – inuttanik ajoqusersinnaasunik angallatip qaavaniittoqanngilaq.
Kisianni videoliap taassuma takutinneqarnissaa eqqartuussiviup akuerinngilaa.
Eqqartuussinerup siulianitut Nunatta
Eqqartuussisuuneqarfiani suliareqqitassanngorlugu aalajangiisoqarpoq.
Taamatullu aamma Paul Watson tigummigallarneqaannassasoq inaarutaasumik
aalajangiunneqarpoq. Kalaallit Nunaanni Eqqartuussiviit aalajangernerat naapertorlugu,
Watson oktobarip aappaata tungaanut tigummigallarneqassaaq.
Politiit maanna misissuipput
Eqqartuussinerup siulianiilli avatangiisit
pillugit ilungersuussaqartup 73-inik ukiullip, Japanimi oqartussat piumasaat
malillugu Japanimut tunniunneqarnissaanut tunngavissaqavinnersoq, Kalaallit
Nunaanni Politiit misissussagaat Justitsministeriap qinnuiginnissutigaa.
Ministeriap isumaliuteqarluarnerup kingorna
Japanimit tunniussinissamut qinnuiginnissut itigartereerneqarsinnaanngitsoq
aalajangiussineranik tamanna isumaqarpoq.
Taamaattumik nunatsinni politiit suliamik
misissuileruttorput, eqqartuussinermilu unnerluussisoq Miriam Khalil, tassunga
atatillugu Paul Watson sivisuumik killisiorneqarsimasoq ilisimatitsivoq. Sulili
inerniliinissaq siusippallaartoq, unnerluussisoq ilisimatitsivoq.
Hummelgaard siunersiorneqartoq
Nuummi suliap kigaatsumik ingerlanerani,
justitsministeri Peter Hummelgaard (S), sapaatip akunnerani matumani
siunersiorneqassaaq.
Folketingimi inatsiseqarnermut
ataatsimiititaliaq Paul Watson pillugu suliami apeqqutinik arlalinnik
qulaajaaniarluni, ministerip ammasumik siunersiorneqarnissaanik aggersaavoq.
Paul Watsonip tunniunneqarnissaanik Japanip
piumasaqarneranut ”Japanip unioqqutitsilluni arfanniarnerup
ingerlateqqinnissaanik kissaateqarluni inuit akerliullutik ilungersuuteqartut
malersorneraat?”, Peter Hummelgaard naliliinersoq, ataatsimiititaliap paaserusuppaa.
Folketingip nittartagaani allassimasoq
naapertorlugu ”Japanip nunani tamalaani niuerniarluni arfanniarnermut nunat
tamalaat inerteqquteqarnerannik unioqqutitsinini assigalugu, assersuutigalugu
Paul Watsonip eqqartuunneqarsinnaaneranut tunngatillugu, Japanip
arfanniarnermik niuernini illersorniarlugu nunani tamalaani pisussaaffiit
malissagaat”, ministerip neriorsuutigisinnaaneraa inatsisit pillugit
ataatsimiititaliap ilisimatitsissutigineqarnissaa kissaatigaa.
Tamatuma saniatigut avatangiisit pillugit
ilungersuussaqartoq, Paul Watson, tunniunneqassagaluarpat naapertuinngitsumik
inatsisitigut malersorneqannginnissaanik, ministeri Japanimi naalakkersuisunut
qinnuiginnissanersoq, ministeri nassuiaateqassasoq ataatsimiititaliap
qinnuiginnissutigaa. Aammattaaq ”Danmarkimi naalakkersuisut nunani tamalaani eqqartuussiveqarfinnik,
inunnut ataasiakkaanut aamma suliffeqarfinnut nunani tamalaani inatsisinik,
assersuutigalugu imartanik pinngortitamillu illersuinermut, niuerniarluni
arfanniarneq ilanngullugu unioqqutitsisunut pineqaatissiisinnaasunik
pilersitsinissamut tapersersuinersut”, justitsministerip aamma
nassuiaateqarfigissavaa. SF-meersut Karina Lorentzen Dehnhardt aamma Carl Valentin, siunersiuinissamik
kissaateqartuupput, taanna sisamanngornermi septembarip aqqaneq-aappaanni
danskit nalunaaqutaat malillugu 10.15 pissaaq. Siunersiuineq Folketingip
nittartagaani, ft.dk-mi isiginnaarneqarsinnaavoq.
