Winnie Ingemann 18-inik ukiulik kommunimut qinigassanngortippoq
Qeqqata Kommunianut qinigassanngortittut nukarlersaat allannguinissamut piareeqqavoq. Winnie Ingemann (IA) oqartussaassuseqaleqqammerpoq qinersisinnaatitaaleqqammerlunilu - piffissaajanngilarlu - inuusuttut atugaat pitsanngorsarniarlugit kommunimut qinigassanngortippoq.
Assi: Inuit Ataqatigiit
Winnie Ingemann 18-leeqqammerpoq. Kommunimullu qinersileruni qinerserngaassaaq.
Aqqili qinigassat akornanniissaaq, tassami nukarlersaalluni Qeqqata Kommunianut qiniagassanngortippoq.
Tassungali politikki nutaajunngilaq.
Meeraallunili politikkertoq
Winnie Ingemann arfinilinnik ukioqarlunili qinersisoqaraangat Inuit Ataqatigiit malinnaaffigisarsimavai. Taamaalilluni allannguiumaarluni.
Taanna Nakuusami, Meeqqat Isummersorfiini, Sorlammilu ukiuni arlalinni suleqataasareerpoq, angalasarsimallunilu meeqqat inuusuttullu atugarisaanik pitsanngorsaaqataaniarluni.
- Isumaqaramalu inuusuttumik kommunalbestyrelsimi sulisinnaasumik amigaateqartoq, inuusuttortatta ulluinnaanik pitsanngorsaaqataasinnaasumik, Facebookimini allappoq.
Meeqqat meeqqat atuarfianniit naammassigaangata ingerlariaqqittarnissaat sulissutigerusuppaa:
- Meeqqat atuarfianniit ingerlaqqiffissat erseqqissumik saqqummiunneqartalernissaat suliniutigerusuppara, amerlammatami angajoqqaat nalornisut, tamaasillutik meeqqat aallaratik ingerlariaqqinngitsoortarput.
- Isumaqarama meeqqat meeqqat atuarfiannit ingerlariaqqinnissaannut paasititsiniaaneq naammanngitsoq. Qeqqata Kommuniani ilinnialeqqittartut amerlisassagutsigit paasititsiniaaneq annertunerusariaqarpoq. Siullertut taanna suliassanngortikkusuppara. Inunnik ilinniarsimasunik amigaateqarpugut taanna aaqqittariaqarparput. Alloriarneq siulliusarpoq meeqqat atuarfianniit aninermi ingerlariaqqiffik, Winnie Ingemann, Inuit Ataqatigiit sinnerlugit kommunimut qinigassanngortittoq allappoq.
