World of Greenland Hotel Arcticilu kattunneqartut
World of Greenlandip suliani allanngortillugit takornarianik angallassisarnini unitsissavaa, Air Greenland ilisimatitsivoq.
- Angallassinernit tunuarternitsinnut piffissaq eqqoqqissaarpoq. Takornariaqarneq angallassinertigullu unammillerneq sukkaqisumik ineriartorpoq, tamannalu pitsaalluinnartutut isigaarput, Air Greenlandip pisortaaneq Jacob Nitter Sørensen oqarpoq.
Assiliisoq: Leiff Josefsen
Air Greenlandip ingerlatseqatigiiffiutimi marluk, World of Greenland aamma Hotel Arctic, ingerlatseqatigiiffimmut nutaamut Arctic Hospitality Cooperationimik taaguutilimmut kattutsippai.
Maajip aallaqqaataani 2025-mi kattussineq pissaaq.
Air Greenland pingasunngornermi tusagassiuutinut taama nalunaaruteqarpoq.
Air Greenland naapertorlugu World of Greenland kattunnermut atatillugu allamik suliaqalissaaq Ilulissallu eqqaani angalatitsisartutut tunuarluni:
- Angallassinernit tunuarternitsinnut piffissaq eqqoqqissaarpoq. Takornariaqarneq angallassinertigullu unammillerneq sukkaqisumik ineriartorpoq, tamannalu pitsaalluinnartutut isigaarput, Air Greenlandip suliffeqarfissuani pisortaaneq Jacob Nitter Sørensen oqarpoq.
Avannaani takornariaqarneq ineriartortinneqassaaq
Air Greenland naapertorlugu ingerlatseqatigiiffik nutaaq Arctic Hospitality Cooperation Ilulissani 2026-mi mittarfissap nutaap ammarnissaanut atatillugu “Avannaa ornigassatut” ineriartortitseqataaffigissavaa:
- Ullumikkut inissatigut ima tatineqareersimavugut silarlukkaangat inerujussuarni siniffilersuisariaqartarluta. Tamanna takornariarfissamik piorsaanermut iluaqutaanngilaq. Tikikkuminarnerulernernissaanut maannakkut iliuuseqartariaqarpugut, suleqatigiiulluta, takornariarfissamik piorsaataasinnaasumik, Jacob Nitter Sørensen oqarpoq, nangipporlu:
- Ingerlatseqatigiiffittut inuiaqatigiinnit pigineqartutut piginneqataanissatsinnut pisussaaffeqarpugut, taamaalilluta suleqataalluta takornariaqarnerlu piorsarlugu, Ilulissaniinnaanngitsoq aammali avannaani tamarmi ornigassanik. World of Greenlandimi misilittakkat ilisimasallu pigilikkat atorluarniarlugit aalajangerpugut ingerlatseqatigiiffiup Hotel Arctic peqatigalugu ingerlatseqatigiiffimmut ataatsimoortumut kattunneqarnissaa, Arctic Hospitality Cooperation, taaguutigalugu.
Akunnittarfik nutaaq suliariumannittussarsiuunneqassaaq
Ingerlatseqatigiiffiup nutaap suliassaa pingaarnerpaaq siulleq tassaavoq Ilulissani akunnittarfiliorneq:
- Mittarfissap nutaap ineriartornissaanut atatillugu, pingaaruteqarpoq illoqarfimmi unnuinissamut periarfissat amerlinissaat taamaalillunilu nunamut tamarmut iluaqusiilluni, Jacob Nitter Sørensen oqarpoq.
Arctic Hospitality Cooperation pilersinneqaraluartoq Hotel Arctic aamma World of Greenland namminneq suli ingerlaannassapput, tassa ingerlatseqatigiiffiup ataatsip iluani.
