WWF-ip nannut illoqarfimmut qanillitsaaliussavaat
Ittoqqortoormiini ulluni kingullerni nannunik naapitsinerit pillugit, WWF
Kalaallit Nunaanni Nannunik alapernaarsuinermik suliaqaqqilerput.
Ittoqqortoormiini nannunik naapitsinerit pisut marluk uani pineqarput, taakku illoqarfimmi meeqqanut
qimminullu qanillivallaarsimammata, innuttaasunut toqqissisimajunnaartitsillutik.
Foto: Malene Lynge
WWF-ip Nannunik alapernaarsuineq, naliginnaasumik augustip qiteqqunnerani atuartut atualernerisa nalaani aallartittaraluarpaa, januaarimilu nannunniarnerup aallartinnissaata tungaanut alapernaarsuisarlutik.
Nannunik alapernaarsuisut suliassaat pingaarneq tassaasarpoq nannut illoqarfiup eqqaani nerisassarsiorlutik qanillattortartut, illoqarfimmut qanillitsaaliorlugit qimaatinnissaat.
Nannut marluk piffissap sivikitsup iluani toqunneqartut
Piffissap sivikitsup iluani, pisut ulorianartut marluk pipput, taamaalilluni nannut taakku Ittoqqortoormiini illoqarfimmiissimasut toqunneqartariaqalersimallutik. Pisuni taakkunani nannut angutivissat anginngitsut saluttut marluusut, WWF allappoq:
- Ittoqqortoormiini nannumik toqutsisoqaqqittariaqarsimavoq. Ukiup imaasinerani pisut ulorianaateqartut marluk pereersimaneri ernumanarpoq, Malene Lynge, WWF Kalaallit Nunaanni pisortaq oqarpoq.
- Toqutsisariaqarnerilli avaqqunneqarsimasinnaanngillat, innuttaasut toqqissisimanissaat qulakkeerniarlugu.
WWF-ip Ittoqqortoormiini innuttaasut toqqissisimanissaat anguniarlugu, pinngortitamik nungusaataanngitsumik atuisinnaannissaat minnerunngitsumik inuit nannullu pinngortitami naligiillutik ataqatigiissinnaanissaat anguniarlugu, sumiiffimmi oqartussat, innuttaasullu suleqatigiuassagaaq, ilanngullugu allaatigaat.
