X, inunnik attaveqaqatigiittarfiusoq, peqquserlunneq pillugu misissuinermut peqataarusunngilaq
X, Elon Muskimit pigineqartup, naapertorlugu, misissuineq "politikki tunngavigalugu" ingerlanneqarpoq.
X, siornatigut Twitterimik ilisimaneqartoq, isumaqarpoq, nittartakkap misissuiffigineqarnera franskit aallartissimagaat "atorneqarsinnaasut oqaaseqarsinnaanerat killilersorniarlugu".
Foto: Dado Ruvic/Reuters
Inuit attaveqatigiittarfiata X-ip ataasinngornermi franskit misissuinerat „politikkikkut pissuteqartuuneqarpaa“ atuisullu killeqanngitsumik oqaaseqarsinnaanerannik navianartorsiortitsisuunerarlugu.
Reuters taama allappoq.
Parisimi unnerluussisut qaammammi matumani siusinnerusukkut X-imik misissuinerminnik annertusisitseqqammernerisa, paasissutissanik tigusinermi peqquserluttoqarneranik aamma qarasaasiap periaasianik kinaassusersiortitsisoqarneranik pasitsaassinerisa kinguneranik taama oqaaseqartoqarpoq.
Reuters naapertorlugu X-ip pasilliutit tamaasa ilumuunnginnerarpai oqarlunilu misissuisoqarnissaanut akuersinani.
- Maannamut ilisimasagut tunngavigalugit X isumaqarpoq misissuineq tamanna Frankrigimi inatsisinik asuli atuiniarnerusoq, aammalu politikkikkut anguniagakkanik naggataatigullu kiffaanngissuseqarluni oqaaseqarnissamut killilersuinermik kinguneqassasoq, X Reuters naapertorlugu oqarpoq.
- Tamakku pissutigalugit X, inatsisitigut pisinnaatitaaffigut tunngavigalugit, Frankrigimi oqartussaasut piumasaqaataannut akuersinngilaq, nangippoq.
X-imik piginnittoq tassaavoq aningaasaatilissuaq Elon Musk, USA-p præsidentianut Donald Trumpimut siunnersortaasimasoq.
Taanna X illersorlugu oqarpoq misissuineq Frankrigimi inatsisartunut ilaasortamit Eric Bothorelimit aallartinneqartoq.
Taassuma X pasillerpaa „nunamit allamit akuliunniartoqarnissaa“ siunertaralugu algoritmiminik allanngortitsisimasutut.
Oqaatigineqartoq „salluliuutiviuvoq“, attaveqatigiittarfik tusagassiutinut nalunaarummi allappoq.
Parisimi unnerluussisussaatitaasoq aamma Eric Bothorel Reutersip oqaaseqarnissaanik qinnuigineqarneranut akissuteqanngillat.
Elon Muskip Europami naalakkersuisut oqaatsinik kiffaanngissuseqarnermik saassussisutut siusinnerusukkut isornartorsiortarsimavai.
Aamma Europami partiit talerperliit ilaat, ilaatigut partiit Tysklandimi nunanit allanit tikittunut tikilluaqqusinngitsut, Alternative für Deutschland, (AfD) tapersersorlugit oqaaseqartareerpoq.
Aningaasaatilissuaq aamma sammisamut sakkortuumik isummertareersimavoq:
- Kiffaanngissuseqarluni oqaaseqarnissamik killilersuisimasut tassaapput inuit soorlu Stalini, Hitleri Mussolinilu.
- Oqaatsinik kiffaanngissuseqarnermik killilersuineq, facistisut naalakkersuinertut ippoq, siusinnerusukkut oqaaseqarsimavoq.
/ritzau/Reuters
