Zelenskyj-p Ukrainemi aningaasaqarnermut ministerertik ministeriunertut ivertinneqarnissaa kissaatigigaa

Ukrainep præsidentiata, Volodymyr Zelenskyj-p, nutaamik ministeriuninngortitsinissi kissaatigaa.

Aningaasaqarnermut maanna ministerertik ministeriunermut aamma tullersortaasoq, Julija Svyrydenko, ministeriuninngortussatut piukkukkini, Zelenskyj inoqatinut attaveqaqatigiittarfimmi X-imi allappoq.

- Julija Svyrydenko Ukrainemi naalakkersuinikkut sulinermik pitsanngorsaangaatsiartussanngorlugu naalakkersuisunut siulittaasunngornissaa siunnersuutigaara, præsidenti X-imi allappoq nangillunilu:

- Naalakkersuisuulersussat iliuusissatut pilersaarutaasa qanittukkut saqqummiunneqarnissaat qilanaaraara.

Ukrainep aningaasaqarnerata nukittorsarnissaanut, Ukrainemiunut ikiorsiissuteqarnerusalernissamut nunamilu sakkussiornerusalernissamut suliniutit Svyrydenkolu oqaloqatigiissutigisimagitik, Zelenskyj aamma allappoq.

- Tamakkua anguniarlugit Ukrainemi naalakkersuinikkut aqutsinermut tunngasutigut allanngortiterilluta aallartippugut.

Denys Sjmyhal Ukrainep ministeriuneratut 2020-mi marsimili atuuffeqarpoq.

Taanna taamaalilluni Sovjetunionip uppinnerata kingorna Ruslandip Moskvamit aqunneqarunnaarluni namminiilivinnerata kingorna naalakkersuisuinut maannamut sivisunerpaamik siulittaasuusimasoq, nutaarsiassaqartitsivik Reuters allappoq.

Ukrainep aningaasaqarnermut maanna ministeria 39-nik ukiuliusoq, Ruslandip Ukrainemik tiguaanissaanut qaammatialunnguit sioqqullugit ministerinngortinneqarluni Zelenskyj-p Ukrainemi naalakkersuisuutitaanut ilannguppoq.

Svirydenko ministeriunertut ivertinneqartigani Ukrainep inatsisartuinit akuerineqaqqaartariaqarpoq.

Ukrainep inatsisartuisa Zelenskyj nunami tassani sorsunnerup aallartinneraniilli tapersersorlugulu taasinermi qularnanngitsumik akerlernavianngikkaat, nutaarsiassaqartitsivik AFP allappoq.

Svyrydenkop Sjmyhalillu Zelenskyj-p allamik ministeriuninngortitsinissamik siunnersuuteqarnera oqaaseqarfigerusunngikkallarpaat.

Ukrainep naalakkersuisuisa nikerartarsinnaanissaat USA-p Ukrainemut immikkut aallartitaata Keith Kelloggip Ukrainep præsidentia ataatsimeeqatigiartorlugu Ukrainemi illoqarfiit pingaarnersaannut Kyivimut tikeraarnerani nalunaarutigineqarpoq.

Kellogilu ilaatigut Ukrainep illersornissaqarfiata silaannakkut nakkutilliisoqarfia, EU suleqatigalugu sakkussioqatigiinnissaq Ruslandimullu pillaatitut iliuuseqarnissaq oqaloqatigiissutigigitik, præsidenti Zelenskyj inoqatinut attaveqatigiittarfimmi X-imi allappoq.

ritzau/