Zelenskyj: Russit dronenik 400-nik unnuaq saassussinerminni igeriussipput

Russit rakettit 18-t qaartartullu ungasianiit aquttakkat tassa dronet 400-t atorlugit Ukrainemut sisamanngornermut unnuaani saassussinerminni igeriussimagaat, Ukrainep præsidentia Volodymyr Zelenskyj oqarpoq.

Nutaarsiassaqartitsivik Reuters taama allappoq.

Ukrainemi saassusserujussuaqattaartoqartoq, ulluni kingullerni tulleriinni nalunaarutigineqarpoq.

Saassussinerit russit nunanut allanut tunngasuni ministeriata Sergej Lavrovip USA-llu nunanut allanut tunngasuni aamma ministeriata Marco Rubiop Malaysiami naapeqatigiileruttorneranni pipput.

Inuit pingasut Ukrainep kangisissuani illoqarfiit ilaanni Kostjantynivkami saassussinermi toqutaasut, Ukrainep upalungaasimasuisa pingasunngornermi ilisimatitsissutigigaat nutaarsiassaqartitsivik Reuters allappoq.

Inuk ataaseq ikiligaasimasoq aamma nalunaarutigineqarpoq. 

Allaffeqarfissuaq saassussinermi asuatitersimasoq, nalunaaruteqartarfimmi Telgramimi allagarsiissutigineqarpoq. Upalungaarsimasut toqungasut timaannik marlunnik aseqqukuni nassaarsimapput.

Qatserisartut illunik ikuallattunik sisamanik aamma qamitsisimapput.

Russit Kostjantynivkami qaammatini kingullerni saassussisaqattaarput. Illoqarfik taanna Ukrainemi nunap immikkoortuani Donetskimiippoq.

Nunap immikkoortuani tassani innuttaasut najugakkaminniit qimagullutik “Ukrainemi nunap immikkoortuinut ulorianannginnerusumukarnissartik” isumaliutigisariaqaraat, Donetskimi guvernøri Vadym Filasjkin nalunaaruteqartarfikkut Telegramikkut allasiusinnerusukkut allappoq.

Rusland Ukrainemi illoqarfiit pingaarnersaanni Kyivimi aamma saassussisimasoq nalunaarutigineqarportaaq.

Inuit pingasut saassussinermi toqutaasimasut aqqaneq-marlullu ikiligaasimasut, illoqarfimmi tassani sakkutuunut aqutsisoqarfimmeersut oqaatigaat.

- Ajoraluartumik toqutaasut marluupput. Taakkua russinit toqutaapput, Kyivimi sakkutuunut aqutsisoqarfimmeersoq Tymur Tkatjenko Telegramikkut nalunaartoq Reuters allappoq.  

Kyivimi saassussineq akunnerit qulit missaannik sivisussuseqartoq sakkutuunut aqutsisoqarfimmit aamma ilisimatitsissutigineqartoq, nutaarsiassaqartitsivik AFP allappoq.

Illoqarfimmi qanoq aseruatititertoqartigisimanersoq suli ilisimaneqanngitsoq, sisamanngornermi Danmarkip nalunaaqutaa naapertorlugu ullaakkut nalunaarutigineqarpoq. 

Saassussinerit Ukrainep silaannakkut saassussinermut illersornissaqarfianeersunit pakkerniarneqarsimasut, Reuters allappoq.

Ukrainep silaannakkut saassussinermut illersornissaqarfianeersut qaartartunik igeriuttanik ungasianiillu aquttakkanik saassussisoqaratarsinnaaneranik aarlerisaaruteqarsimasut, nutaarsiassaqartitsivik dpa siusinnerusukkut allappoq. Tamatumunnga tunngatillugu innuttaasut tamarmik eqqorneqatsaaliorluni qimaaffissanukalertoqquneqarput

Illoqarfimmi unnuap ingerlanerani qaartartumeerinerit tusarsaasimasut, ilisimannittut oqaatigaat. 

Saassusinerit Ruslandimit suli maannamut oqaaseqarfigineqanngillat.

/ritzau/