2023-mi umiarsuarni takornariartaatini ilaasut amerleriarujussuartut
2023-mi umiarsuarnik takornariartaatinik angalasut katillugit 76.477-it Kalaallit Nunaannut tikeraarsimapput, kisitsisit nutaat tamanna takutippaat.
Umiarsuarnut takornariartaatinut ilaasut 2023-mi aatsaat taama amerlatigipput.
2023-mi katillugit 76.477-it umiarsuarnut takornariartaatinut ilaallutik Kalaallit Nunaannut takornariarsimapput. Tamanna 2022-mi ilaasut amerlassusaannut naleqqiullugu 73,8 pct.-inik qaffariarneruvoq, Naatsorsueqqissaartarfik allappoq.
Aamma 2019-imi ilaasut amerlanerpaaffiannit, tassa 46.633-nit, amerlanerungaarput.
2023-mi umiarsuarnik ilaasorpassuit umiarsualivinniissimasut katillugit 187.710-usimapput.
Aqqusaartut 518-it
2023-mi katillugit 183-inik takornariartaatinik umiarsuaqarsimasoq 518-eriarlunilu aqqusaartoqarsimasoq, Naatsorsueqqissaartarfik itisiliivoq.
- Umiarsuit amerlanersaat 0-250-it akornanni ilaasunut inissaateqarput. Umiarsuilli 1200-it sinnerlugit ilaasunik inissaqartitsisut katillugit 46.375-inik ilaasoqarnerpaasimallutik, Naatsorsueqqissaartarfik taama allappoq.
Ilaasut nunanit assigiinngitsuneersuupput, amerlanerpaat USA-meersuullutik, Tysklandimeersuullutik Tuluit Nunaanninngaanneersuullutillu.
Soorlu ataani takuneqarsinnaasoq, USA-mit timmisartumik angalasut 2022-miit 2023-mut marloriaatingajammik amerlisimapput.
Umiarsuarnik takornariartaatinik takornariarpassuit oqallinnermut sunniuteqarluarput, ukioq mannalu aallarnerfigalugu takornariartitsisartut akitsuuserneqaqqissapput, takornariartitsinermit taama ittumit aningaasatigut iluanaarutit annertusarniarlugit.