2024-mi avammut tunisaqarneq aallartilluarpoq
Naatsorsueqqissaartarfiup kisitsisaataasa takutippaat raajanik avammut tunisineq 2024-mi aallartilluarsimasoq.
2024-mi januaarimi avammut tunisat nalingi katillugit 478 millionit koruuniusimapput. Ukiup siulianut sanilliullugit 188 millionit koruuninik annertunerupput, annertuseriarnerlu katillugu 64,8 procentiuvoq.
Kisitsisaataagallarmata mianersorluni paasisariaqartut misissoqqissaaraanni, aalisakkat sorliit avammut tunisat nalinginnaasumik amerlanerpaanik pissarsissutaasartut assigiinngitsorujussuusutut paasineqarsinnaavoq.
Raajat, saarulliit, qalerallit, saattuat nipisaallu suaat pisat kisimik nalunaarsorneqarsimapput, nipisanniarfiunnginnera pissutigalugu nipisaat suaannik pisat ilanngunneqarsimanatik.
Raajanik avammut tunisineq siuariartornermut pissutaanerpaavoq, tassami siorna piffissamut tassunga sanilliullugu januaarimi raajanik avammut tunisineq 45,9 procentimik qaffariarpoq.
- Tamanna 67 millionit koruuninik naleqarpoq, avammut tunisat annertussusaat 39,6 procentimik annertuseriarsimasoq akillu 4,5 procentinik qaffallutik.
Qalerallit avammut tunineqartut nalingat 38,8 procentimik annertuseriarsimavoq, tunineqartut annertussusaat 47,8 procentimik annertuseriarsimasoq. Taamaalilluni kiilumut akit 6,1 procentimik appariarsimapput.
Akit appariarnerat
Saarulliit avammut tunineqartut kiilumut akia 22,6 procentimik appariarpoq. Avammut tunineqartut nalingat 153,1 procentimik qaffariarpoq, tunineqartut annertussusaat 226,8 procentimik annertuseriarsimallutik.
Saattuat akiisa appariarnerat annertunerpaavoq, kiilumut akia 27,4 procentimik annikilleriarsimalluni. Avammut tunineqartut nalingat 7,0 procentimik annertuseriarsimavoq, tunineqartut annertussusaat 47,3 procentimik qaffattoq.
Ukiup qaammataani sisamani siullerni avammut tunisat nalinginnaasumik appasinnerpaasarput, januaarimili avammut tunisat ukiup qaammataani tunisaqarfiunerpaajusuni allani tunisat nalinginnaasut qaangerpaat, soorlu Naatsorsueqqissaartarfiup takussutissaani takuneqarsinnaasoq.
