Inuussutissarsiorneq pillugu ataatsimeersuarnissamut peqataaniarlutik nalunaartut 250-iupput, taannalu aaqqissuunneqarpoq Kalaallit Nunaanni Sulisitsisut Peqatigiiffiannit, Kalaallit Nunaanni Takornariaqarnermut Inuussutissarsiornermullu Siunnersuisoqatigiinnit kiisalu Grønlandsbankimit, ingerlanneqassallunilu Nuummi sisamanngorpat tallimanngorpallu.
»Kalaallit ingerlatsivii siunissami - aqutsineq, suleqatigiinneq attaveqarnerlu«, tassa inuussutissarsiutit pillugit ataatsimeersurnermi, ullumi Katuami aallartittumi, sammineqartussat.
Tamatumunnga tunuliaqutaavoq Kalaallit Nunaanni inuussutissarsiortut ukiuni aggersuni unammilligassarujussuaqalernissaat, ilaatigut aatsitassanik piiaaffinnik suliffissuaqarnerup ineriartortinnera, uuliasiorneq aammalu aluminiumik tunisassiorneq.
- Kalaallit Nunaanni ingerlatsiviit qaqutiguinnaq angissuseqartarput, sanaartukkanut tunisassianullu annertuunut atatillugu suliassanik annertuunik tigusinissaminnut. Taamaattumik kalaallit ingerlatsivii mikisut angisuullu ineriartornermik naapitsinissaminnut piukkussassapput ilaatigut nutaamik eqqarsaatigalugit aqutsineq, suleqatigiinneq attaveqarnerlu, ataatsimeersuarnissap ilisaritinneqarnerani allassimavoq.
Qimussit ilisarnaataapput
- Kalaallit qimussiat inuussutissarsiorneq pillugu ataatsimeersuarnerup sammisassaanut sakkortuumik ilisarnaataavoq. Aqutsineq qimussersumit ingerlanneqartarpoq, taassuma nalunngimmagu qimussit sumut ingerlassanersut. Suleqatigiinneq pisarpoq ittoqutip qimuttullu allat qimussinik ingerlatsisut akornanni. Tamarmik ataqatigiipput qimuttut pituutaatigut. Ilisarnaat tamanna ataatsimeersuarnermi tamarmi aallaaviussaaq, neriuppugullu ataatsimeersuarneq nunatsinni inuussutissarsiortut siunissamik naapitsinissaannut isumassarsisitsillunilu ineriartortitsissasoq, aaqqissuussisut allapput.
Saqqummiussisussat ilagaat Michael Binzer, Henning Dyremose aamma Lars Stadil.
Ataatsimeersuarneq qallunaatut ingerlanneqassaaq kalaallisuunngortitsisumik oqalutsilerluni.