Aaffattassat pisaqarpallaartarnermit ikinnerulerput
2013-mi Qaanaami piniartunut aaffattassat ukioq manna pisaqarpallaartarneq peqqutigalugu ikilineqarput. Nunap sinnerani pisaassat taamaaginnarput
2013-mi Qaanaap eqqaani aaffattassat taamaallaat 52-iupput, namminersorlutik oqartussat nalunaarput.
Ukiuni marlussunni kingullerni 12-inik ikinnerupput, tassanilu peqqutaavoq 2012-mi aavernik 12-nik pisaqarpallaarsimanermit aappaagu pisaassaniit 64-init ikiliisariaqalerneq. Pisaassalli suli ikinnerulersinnaapput 2013-mi pisaat januaarimi 2013-mi naggataarutaasumik naatsorsorneqarpata.
Nunatsinni aaffattassat 2013-mi 143-upput ukiuni kingullerni taamaaginnarluni.
Nunap sinnerani pisaqarpallaarsimaneq 2013-mi pisaassanut sunniuteqanngilaq taamaalilluni Upernaviup eqqaani arfineq pingasut pisarineqarsinnaallutik, Uummannami Qeqertarsuarmi, Ilulissani, Qasigiannguani Aasiannilu katillugit 19-it pisarineqarsinnaallutik, Kangaatsiami arfineq pingasut, Sisimiuni 22-t Maniitsumilu sisamat.
Tunumi pisaassat katillutik 18-iupput, taakkunannga Illoqqortoormiuni 11-iullutik Tasiilallu eqqaani arfineq marluullutik.
Namminersorlutik oqartussanit misissorneqaleruttorpoq pisarinngitsuukkut ukiumiit ukiumut nuunneqarsinnaasassanersut, taamaattoqarsimanngilarmi maannamut. Tamannali 2013-mi pinavianngitsoq maannangaaq oqaatigineqareerpoq.