Kalaallit avammut
niuertut nipisanniarnermut malittarisassat maanna atuuttut atorlugit danskit
niuerfiannut suannik nillataartunik niueruteqarnermi iluatsitsinissamut
periarfissanut isummat assigiinngillat.
Jesper Kongsted,
auktionsmesteri Hanstholm Fiskeauktionimillu piginnittoq aperigaanni akissut
erseqqissoq tassaavoq, Naamik!
Kalaallit avammut
niuertut nipisanniarnermut malittarisassat maanna atuuttut atorlugit danskit
niuerfiannut suannik nillataartunik niueruteqarnermi iluatsitsinissamut
periarfissanut isummat assigiinngillat.
Jesper Kongsted,
auktionsmesteri Hanstholm Fiskeauktionimillu piginnittoq aperigaanni akissut
erseqqissoq tassaavoq, Naamik!
Taanna Danmarkimi
aalisakkanik akitsorteriviit annersaanni, ukiumut aalisakkanik 40.000 tons
sinnerlugit annertutigisunik kaaviiaartitsisumi pisortaavoq.
- Nipisat
suaannik nillataartunik Kalaallit Nunaannit Danmarkimut timmisartukkut
nassiussinermi, taakkulu danskit niuerfianni tuninerini isertitat maannakkut
ima appasitsigaat, allaat uanga isumaga malillugu pilersuisumut tamanna imminut
akilersinnaanani. Taamatut maannakkut isigaakka, Jesper Kongsted Sermitsiamut
oqarpoq.
Apriilip
aallaqqaataata kingorna avammut niuerneq kingusinaareertartoq
Apriilip
aallaqqaataata kingorna nipisat suaannik Kalaallit Nunaanneersunik avammut
niuerlunilu tunisineq kingusinaareertartoq, taanna erseqqissaavoq, tamannalu
ukioq manna tikillugu malittarisassat malillugit Kalaallit Nunaanni
nipisanniarneq aallartittarpoq.
Royal Greenlandip
sapaatit akunnerani kingullermi sisamanngornermi nipisat suaat nutaat Nuummit
Danmarkimut timmisartukkut nassiuppai. Suaat Jyllandip avannaani Hastholmimi
akitsorterinermi tunineqarnissaat pilersaarutaaqqaarsimagaluarpoq.
Assartuinikkulli ajornartorsiutit pissutigalugit nassiussat tamakkerlugit
Københavnimi ingerlatitseqqiisartumut tunineqarput.
Tunisassiornermi
pisortaq: - Iluarisimaarinnippugut
Suaat
neriniartarfinnut, akunnittarfitsinnut kantiinanullu ullup tulliani ernertumik
tunineqarput.
- Royal
Greenlandi tunisinermi kiilumut danskit koruuniinik 90-innappoq, tamannalu
soorunami iluarisimaarparput, ingammik ukiup qanoq ilinerani tamanna
kingusikkaluartoq, Royal Greenlandimi tunisassiornermut pisortaq Meinhard
Jacobsen Sermitsiamut oqarpoq.
Maanna tunisinermi
misileraasoqarnera erseqqissassallugu pingaaruteqartoq pisortaq nassuiaavoq.
- Suliaq ingerlaartuuvoq, tassanilu nipisat
suaat nunatsinneersut nillataartut qanoq pitsaanerpaamik tunisinnaanerat
ingerlaavartumik misilerarparput. Nassiussat tamarmik immikkut
annertussutsinut, saaffigisanut akillu annertussusaannik nutaamik
ilisimasaqalersittarpaatigut, taanna oqarpoq, imalu nangilluni:
- Naak
tunisineq imminut akileraluartoq, taamaattoq piviusorsiornissaq
pingaaruteqarpoq. Timmisartukkut assartuineq assartuinermilu aningaasartuutit
allat tunisinermi akip affaanik annertussuseqarput, aalisartumullu akiliut
pingajorarterutaalluni. Taamaammallu matumani annikitsuinnarmik
iluanaaruteqartoqarpoq, Meinhard Jacobsen oqarpoq.
Misileraanerit
amerlanerusut
Royal Greenlandip
misileraanerup nanginnissaa, arlaqarnerusunillu nassitsinissaq pilersaarutigaa,
taamaalilluni ingerlatseqatigiiffik siunissami aalajangiinissaminut
tunngavissagissaarnerusinnaaqqullugu, taanna oqaluttuarpoq.
Poorskip missaani
Nuummi aalisartoq nipisat suaannik nillataartunik marloriarluni, katillugit 500
kiilunik nassitsivoq, taakkulu Hanstholm Fiskeauktionimi tunineqarput.
Akit kiilumut 1.000
koruunit angullugit
- Kalaallit
aalisartut suliffeqarfiillu taamak kingusitsigisukkut Danmarkimut nipisat
suaannik nillartaartunik nassitsinermi annertuumik iluanaaruteqarnissaq
naatsorsuutigissanngikkaat, Hansthom Fiskeauktionshusimi pisortaq Jesper
Kongsted isumaqarpoq.
Danmarkimi nipisat suaat nillataartut januaarimit
poorskip tungaanut akigissaartillugit tunineqartartut, taassuma oqaluttuaraa.
- Januaarimi
aallartinnermit sapaatit akunneri sisamanit arfinilinnut nipisat suaat danskit
niuerfianni qaffasissorujussuarmik akeqartinneqartarput. Tassani tunisassiassat
neriniartarfinnut aalisagaarniarfinnullu kiilumut 1.000 koruunit angullugit
akilersillugit tunineqarsinnaapput, auktionsmesteri oqarpoq.
Auktionsmesteri: - Kalaallit Nunaanni malittarisassat
allanngortinneqarlik
Taanna aalisartunut Royal Greenlandimullu, nipisat suaannik
nillataartunik timmisartukkut avammut niueruteqartunut ima
oqariartuutissaqarpoq:
- Kalaallit
aalisartuisa ilaasa uannut oqaluttuarnerat malillugu, Kalaallit Nunaanni
nipisat april aallaqqaataa sioqqullugu pisarineqarsinnaanissaat piariissappata,
taava aalisartut oqartussallu peqatigiillutik januar-februaariinnartorlu
aalisalereersinnaanermik akuerineqarsinnaaneq misissortariaqassavaat.
Taamaattoqalerpat taava kalaallit aalisartut avammullu niueruteqartut ulluni
nuannersuni, akit qaffasiffiini peqataasinnaalissapput, Jesper Kongsted
Hanstholm Fiskeauktionimeersoq oqarpoq.
nipisat suaat
amerlanerit apriilip aallaqqaataata kingorna suliffissuarni
tunisassianngortarnerat taassuma oqariartuutigaa, taakkulu januaarimit marts
ilanngullugu dansit niuerfianni akigitinneqartut akiinik annikinneralaarsuarmik
akiliisarput.
Royal Greenland 900
kiilunik illit akitsorterinerni iluanaaruteqartoq isumaqarpit?
- Imaassinnaavoq
annikitsuaqqamik iluanaaruteqartut. Isumagalu malillugu ulapputiginerannut akit
naapertuutinngillat, Jesper Kongsted oqarpoq.
Malittarisassat taamaapput
Naatsumik nassuiassagaanni nipisanniarnermut
nalunaarummi pisoqqami, inuussutissarsiutigalugu arnarlunniartarneq taamaallaat
apriilip aallaqqaataanit akuerisaavoq. Taannalu maanna aalisarsinnaanermut
akuersissutit pisassiissutillu pillugit Namminersorlutik Oqartussat
nalunaarutaannik taarserneqarpoq, tassanilu § 29 ima oqaasertaqarpoq:
- Inuussutissarsiutigalugu nipisanik arnarlunnik
aalisarneq piffissami aalisarfigeqqusaasumi taamaallaat akuerisaavoq,
Aalisarnermut Piniarnermullu Naalakkersuisumit aalajangersarneqartartoq.
Aalisarnermullu Naalakkersuisoqarfiup ulloq 1. april 2026 sioqqullugu
aalisarneq ammarsinnaaneraa maanna apeqqutaalerpoq.
nipisat suaannik pisassat allaffissornikkut
qaammatinut arfineq marlunnut agguarneqarput.
- Tamanna peqassutsimut attuumassuteqanngilaq,
matumanimi ataatsimut peqassuseq pineqarmat. Tamanna aalisarnerup
agguataarnissaa pillugu suliaavoq, taamaalilluni Nuummi Paamiunilu aalisartut
nipisat Sisimiunut anngunnissaat sioqqullugu pisassanik tamakkeeqqunagit,
fuldmægtig Jens Lykke Borch Kalaallit Nunaanni Aalisarnermut Piniarnermullu
Nakkutilliisoqarfimmeersoq oqarpoq.
Ukioq manna aqutsiveqarfinni arfineq marlunni pisassat
katillugit 1.476 tonsiupput. Immikkoortoq 1D-mi, Nuup inissisimaffiani,
pisassat 302 tonsiupput.
