Aalisakkanut akit patajaallisimapput - saarulliit akisunerulersimapput

Aalisakkat pingaaruteqarnerpaat akii ukiuni marlunni appariartoreerlutik patajaallisimapput. Saarulliit akii qaffassimapput.

Kalaallit Nunaanni Naatsorsueqqissaartarfiup aalisakkat kvartalit pingajuanni avammut tunisat pillugit saqqummiussaanni tamanna takuneqarsinnaavoq. Aalisakkat Kalaallit Nunaannit avammut unineqarneranni akinut naleqqersuutit naatsorsorneqarsimapput.

• Raajat akii 2 procentit missaannik apparsimapput.
• Qalerallit akii 1 procentimik qaffassimapput.
• Saarulliit akii 8 procentit missaannik qaffassimapput.

Kalaallit Nunaanni Naatsorsueqqissaartarfiup aalisakkat avammut tunineqartut malinnaaffigeqqissaartarpai, 2021-milu qaammatini aqqanilinni siullerni avammut tunissat pillugit kisitsisit nutaat saqqummiullugit.

Kisitsisini takuneqarsinnaavoq, 2021-mi januaarimiitnovembarimut avammut tunineqarsimasut 4.069 millioner koruuninik naleqartut.

- Ukiup siulianut sanilliullugit 414 millioner koruuninik annikilleriarput, tamannalu katillugu 9,2 procentiuvoq, Naatsorsueqqissaartarfik allappoq.

Naatsorsueqqissaartarfimmit kisitsisaagallartut allanngorsinnaasut pineqarmata immikkut sillimaffigineqarput.

Naatsorsueqqissaartarfiup aalisakkat assigiinngitsut avammut tunisat imatut naatsorsorsimavai:

Raajat:

Raajat 2021-mi januaarimiit novembarimut avammut tunisaanerisa nalingat 4,9 procentimik appariarsimavoq, tamanna 107 millioner koruuninik naleqarpoq. Appariaat avammut tunisat akikinnerulernerannik aallaaveqarpoq, tassa raajat avammut tunisat 6,4 procentimik akikilleriarsimammata. Avammut tunisat oqimaassusaat 1,6 procentimik annertuseriarsimavoq.

Qalerallit:

Qalerallit avammut tunineqartut nalingat 16,0 procentimik annikilleriarsimavoq, tamannalu 214 millioner koruuninik naleqarpoq. Avammut tunisat oqimaassusaat 8,2 procentimik apparsimavoq, kilumullu agguaqatigiissillugu aki 8,6 procentimik apparsimalluni.

Saarulliit:

Saarulliit avammut tunineqartut nalingat katillugu 11,4 procentimik annikilleriarpoq, tamanna 45 millioner koruuninik naleqarpoq. Avammut tunineqartut oqimaassusaat 3,7 procentimik annertuseriarpoq, kilumullu agguaqatigiissillugu aki 14,5 procentimik apparsimalluni.