Aalisakkat ikinnerit EU'mik isumaqatigiissutaasut

Kalaallit Nunaata aamma EU'p akornanni aalisarneq pillugu suleqatigiinneq tallimanngornermi nutaamik isumaqatigiissusiorfigaat, piffissami 2013 - 2015 EU'p nunatta imartaanik aalisarnerata iluarsartuuteqqinnissaa kiisalu EU'p akiliutissai.

2011-mi maaji qaammataannili pingasoriarluni isumaqatigiinniartoqarpoq Ilulissani, Bruxellesimi aamma København. Isumaqagiinniarnerit atorfilittanit ingerlanneqarput. Tamatuma saniatigut nunatsinni aalisarnermik ingerlatsisut sinniisaat kalaallit aallartitaattut peqataapput. Isumaqatigiinniarnerit ingerlanerisa nalaanni aamma teknikki pillugu oqaloqatigiittoqartarpoq.

Aalisarnermik isumaqatigiissutitavik immini allannguuteqanngilaq, aalisarnermulli piumasaqaatit, isumaqatigiissummi allattorneqartut makkunatigut allannguuteqarput.

- Isumaqatigiinniarnermi uani angusarineqartut naammagisimaarpakka Nunap karsianut pisariaqartunik tapertaasussaammata. Aningaasat nalingat siornatigornit angineruvoq, tamatuma saniatigut EU'p aalisagartassaannik ikililerivoq, taamaaliornikkut aalisarneq imminut napatissinnaanerusoq aammalu kalaallit aalisartuisa soqutigisaannik aallaaveqarpoq, ilaalluni nunatsinnit aalisakkat tunisassiarineqartut EU'mi tuniniarnerini akitsuusersuinnginnissaq pissarsiarineqarluni, aalisarnermut, piniarnermut nunalerinernullu naalakkersuisoq Ane Hansen oqarpoq.

EU, kommissioni aamma umiarsuaatilli ukiut tamaasa 17,9 millioner euronik - imaluunniit 146 millioner koruuninik Kalaallit Nunaannut nunatta imartaani aalisarsinnaanermut akiliutigisassavaat. Immikkut pisassat isumaqatigiissutigineqarput. Immikkut pisassanik isumaqatigiissuteqartoqaqqissappat aatsaat EU 11 millioner koruuninik akiliissaaq.

Isumaqatigiinniarnerni angusaq Naalakkersuisunit EU'millu akuerineqaqqaassaaq januaarip allaqqaataani 2013 atuutilinnginnermini. Kiisalu isumaqatigiinniarnerni angusaq EU'mik suleqatigiinnissamik isumaqatigiissutivimmik qulakkeerinneqataassalluni.

Pisassat amerlassusaat allaatigisap assitaata aappaani takusinnaavat.