Aalisakkerinermik suliffissuaq sinneqartooruteqarnerusimasoq - danskit ingerlatseqatigiiffiutaat immikkoortortaqarfiujunnaartoq

Polar Seafood Greenlandip ukiumoortumik naatsorsuutai misissoqqaaraanni naammaginanngitsutut ineriartortoqarsimasutut isikkoqarpoq, suliffeqarfissuummi kaaviiaartitarisimasai 2020-mi 3 milliarder koruuniusimasut 2021-mi 1,7 milliarder koruuninngorsimammata.

Ingerlatseqatigiiffilli isertitaqarluarsimavoq, miliuunilikkaanillu sinneqartooruteqarsimalluni.

Siulersuisuni siulittaasup Henrik Lethip tusagassiorfitsigut nalunaaruteqarnermi nassuiaatigaa, kaaviiaartitat annikillingaatsiarsimanerannut Polar Seafood Denmarkip immikkuulerluni nammineq suliffeqarfissuartut inissisimalersimanera pissutaasoq.

Polar Seafoodip "ukiumi naatsorsuiffiusumi suliffeqarfissuup naatsorsuutai Polar Seafood Greenland A/S-mut aamma Polar Seafood Denmark A/S-mut immikkoortissimavai. Akileraarutit ikinnerussuteqartullu pisassaasa peereernerini angusat 107 mio.kr.-nit 174 mio.kr.-nut qaffariaataat aatsaat sanilliunneqarsinnaapput", tusagassiorfitsigut nalunaarummi allassimavoq.

Nutarterineq

Henrik Lethip Sermitsiaq.AG-mut oqaatigaa, ingerlatseqatigiiffiup aaqqissuussaaneranik nutarterisimaneq matumani pineqartoq:

- Suliffeqarfissuarmik ataasiinnarmik peqarunnaarluta suliffeqarfissuarnik marlunnik peqaliinnarpugut. Piginnittoq siulersuisullu suli taakkuupput, Henrik Leth oqarpoq.

Ukiumoortumik naatsorsuutini tamanna imatut nassuiarneqarpoq:

- Piginnittutut isumaqaqtigiissut allanngortinneqarsimavoq, tassa Polar Seafood Greenland A/S 2021-mi apriilip qaammataata allartinneranit atuutilersumit Polar Seafood Denmark A/S-imut aalajangiisartumik sunniuteqarunnaassaaq. Ingerlatseqatigiiffimmi immikkoortortamit nammineq suliffeqarfissuartut ingerlalermat.

Siulittaasoq: Naatsorsuutit pitsaanerpaat ilaat

Siulersuisuni siulittaasup ilanngullugu oqaatigaa, suliffeqarfissuarmi naatsorsuutit pitsaanerpaat ilagigaat, naaka 2021 sioqqullugu qularnartoqartitsisoqarsimagaluartoq.

- Kinami coronap inissisimanera, Bexit allallu pissutigalugit qanoq ingerlasoqarumaarnersoq nalornissutigisimaqaarput, naatsorsuutigisamilli ingerlalluarnerusimavugut, Henrik Leth oqarpoq.

Akit qaffakkiartortut suliaqarnerulernerlu

Ukiumoortumik nalunaarusiami angusaqarluarsimaneq pillugu imatut allassimasoqarpoq:

- Ukiup ingerlanerani suliffeqarfissuup tunisassiaataasa arlallit akiisa qaffakkiartorsimanerat kiisalu 2020-mut sanilliullugu suliaqarnerusimaneq pissutigalugit angusaqarluartoqarsimavoq. Ilisimatitsissutigineqarpoq, Covid 19 aamma Tuluit Nunaata ulloq 01.01.2021 EU-mit aninera 2021-p aallartinnerani naatsorsuutigisimasatut ajortumik sunniuteqarsimanngiltsut.

Suliffeqarfissuup ukiumoortumik naatsorsuutimini nassuiaatigaa, siulersuisuni arnat angutillu agguagaanerat - suli nikingassuteqartoq

Naligiissitaaneq atorneqarpallaanngitsoq

- 2021-mi siulersuisuni ilaasortat ukiut siuliinut sanilliullugit allannguuteqarsimanngillat, siulersuisut taamaammat suli arnartaqaratik angutaannaarpput arfineq-marluk.

Tassunga nassuiaataasoq aalisakkerinermik suliaqarfimmi nassaassaasoq, oqaatigineqarpoq:

- Polar Seafood Greenland A/S-imi siulersuisut suiaassutsit katitigaanerat, aalisakkerinermik suliaqarfimmi atorneqartartoq malissimavaa, taamaammat arnanik sulisoqarpallaanngilaq. Ingerlatseqatigiiffik tamanna tunngavigalugu aamma danskit inatsisaat naapertorlugit siulersuisut arnartaqalernissaat pillugu politikkiliorsimavoq, pisortatullu atorfinni assigiinngitsuni arnat amerlanerulersinneqarnisssaat sulissutigalugu.

Ruslandimi immikkoortortaqarfik attavigineqarsinnaanngitsoq

Polar Seafoodimut isornartorsiutigineqartarsimavoq, Ruslandi Ukrainemut saassussisimagaluartoq Ruslandimi immikkoortortaqarfiup ingerlatiinnarneqarnera pillugu.

Ingerlatseqatigiiffiup immikkoortortaqarfimmut atatillugu periarsissanik allanik misissuijuarnera ilisimatitsissutigineqarpoq:

Nunamik tiguaaneq aallartimmat Polar Seafood Russia-mut tunisaqartarnerput unitsinniarlugu aalajangerpugut. Ruslandimi ingerlatat uagut sunniuteqarfigisinnaanngisatsinnik matoqqasumik ingerlapput. Polar Seafood
suliffeqarfissuartut piginneqataanermini ingerlatseqataananilu suliffeqarfiutigisat iliusaannut, tassa tuniniaanermi, ingerlatsinermi, aqutsinermi imaluunniit siulersuisut ingerlatsinerini peqataanngilaq.