Aalisarneq pillugu EU-mik isumaqatigiissuteqarneq millionilikkaanik nalilik
Nunatta kitaani EU-mut qaleralittassiissutit raajartassiissutillu ikilisinneqarput, illuatungaanili Tunumi raajat 300 tonsit neqeroorutigineqarlutik
Namminersorlutik Oqartussat EU-mik 2024-mi aalisarnissamut periarfissat pillugit isumaqatiginniarnerit naammassivai.
Aalisarnermut Piniarnermullu Naalakkersuisoqarfiup ilisimatitsissutigaa, kitaani Tunumilu qaleralinnik pisassiissutit ikilisinneqarnissaannik biologit siunnersuuteqarnerat tunngavigalugu kitaanilu raajanik ikinnerusunik pisassiisoqarnissaanik siunnersuuteqarnerisa malitsigisaanik EU neqeroorfigineqassasoq.
Taamaattorli Tunumi raajanik amerlanerusunikpisassiisoqarnissaanik biologit siunnersuuteqarmata, EU neqeroorfigineqarpoq 300 tonsinik saniatigut pisassiisoqassasoq.
Isumaqatigiissut Kalaallit Nunaata EU-llu Aalisarneq pillugu suleqatigiinnissamut isumaqatigiissutip ilagaa. Naalakkersuisoqarfik nassuiaavoq marloqiuisamik isumaqatigiissuteqartoqartoq, siulleq tassaalluni akiliuteqarnikkut aningaasarsiutigalugu aalisagartassat pillugit isumaqatigiissut, aappaalu tassaalluni aalisarnerup ineriartornissaanut tapiissutit pillugit isumaqatigiissut.
100 millioner koruunit sinnerlugit
Ataatsimut 117 millioner koruuninik akeqassasoq naatsorsuutigineqartoq, Naalakkersuisoqarfik tusagassiutinut nalunaarummi allappoq:
- Naatsorsuutigineqarpoq aalisarnissamut periarfissat pillugit isumaqatigiissut 93 millioner koruunit missaanniissasut, EU-milu aalisariutaatillit aalisarsinnaanerinut akiliutit 24 millioner koruunit missaanniissasut.
- Akiliutigineqartut amerlanerusinnaapput ammassanik pisassiisoqarsinnaappat, ammassaat pillugit siunnersuisimaneq pillugu januaarimi 2024-mi saqqummiussisoqareerpat.
Akiliutit ikileriarneri akitsuutinit matussuserneqassapput
Kitaani EU-mut qaleralittassiissutigineqartut 225 tonsinik, Tunumi qalerallit 300 tonsinik, kitaanilu raajat 100 tonsinik ikinneruneri tunngavigalugit EU-p akiliutaa 2023-mut sanilliullugu annikinnerusoq, Naalakkersuisoqarfik nassuiaassivoq.
Taamaattorli raajat kalaallit aalisariutaataasa amerlanernik pisassaqarnissaannut tunngaviliisuussapput aalisarsinnaassusertillu taamaaliornikkut atorluarnerusinnaassallugu.
- Kalaallit Nunaani aalisarnermi pisarineqartut isumalluutinik atuinermut akitsuutinit amerlanerusut pisortanut pisalissapput aamma akileraarutinit. EU-p akiliutaasa ikileriarneri akitsuutigineqartunit aamma akileraarutinit nammineerluta inuussutissiortortatta taarsiullugit aningaasaliissutigisalissavaat, Naalakkersuisoqarfik naliliivoq.
EU-mik isumaqatigiissutigineqartoq Naalakkersuisunut inaarutaasumik akuerisassanngorlugu saqqummiunneqassaaq.