Aalisarneq pillugu Siunnersuisoqatigiinni QAK siulittaasunngorpoq
Mikkili Skourup QAK-meersoq (Qalerualinniat Aalisagarniallu Kattuffiat), Kalaallit Nunaanni Aalisarnermut Siunnersuisoqatigiinni siulittaasunngorpoq.
Aalisarnermut Siunnersuisoqatigiit 2024-mi siullermeerluni ataatsimiinnerat qanittukkut pivoq. Ukiumi nutaami ataatsimiinnermi siullermi aalisarnermut siunnersuisoqatigiit malittarisassaat malillugit siulittaasumik toqqaasoqarpoq. Tamatumuuna siulittaasuuneq KNAPK-meersumit Vittus Qujaukitsumit QAK-meersumut Mikkili Skourupimut nuunneqarpoq.
Taama aalisarnermut naalakkersuisoqarfik tusagassiuutinut nalunaaruteqarpoq.
- Aalisarneq pillugu Siunnersuisoqatigiit pingaarutilimmik inissisimapput, aalisarnermut tunngassuteqartunik aalajangersimasunik Naalakkersuisunut siunnersuisarmata. Kalaallit Nunaanni aalisarnermut ukioq una pingaaruteqartorujussuuvoq, aalisarnermut inatsisissaq tassungalu attuumassuteqartut nalunaarutit aamma Aalisarnermut Pilersaarutit oqaluuserineqartussaapput.
Massakkut Aalisarneq pillugu Siunnersuisoqatigiit pingasunik ilaasortaqarput ukuusunik, GE, KNAPK aammalu QAK.
Siulittaasoq GE-mit KNAPK-millu paarlakaajaattumik toqqarneqartarpoq, siulittaasup tullia kattuffimmit siulittaasuuffeqanngitsumit toqqarneqartarluni. Siunnersuisoqatigiit allattoqarfiat Aalisarnermut Piniarnermullu Naalakkersuisoqarfimmit isumagineqartarpoq.