Aalisarnermut inatsisissatut siunnersuut: Islandimiu piginneqataasoq RG-mit anissaaq

Aalisarnermut inatsisissatut siunnersuut akerleriissutaasoq, Royal Greenlandip 'suliaalluarsimasutut piareersarluarneqarsimasutullu' taasani naammagisimaarpaa, aammali isumaqataanngiffeqarpoq.

Inatsisissatut siunnersuutip nunanit allaneersut piginneqataanerat inerteqqutaalersissagaa, tamannalu Royal Greenlandip ingerlatseqatigiiffiutaanut Pelagic Greenlandimut, Islandimiup 27 procentinik piginneqataaffigisaanut sunniuteqassasoq, aalisarnermut ingerlatseqatigiiffik tusarniaanermut akissummini aamma allappoq.

Nunanit allaneersut piginneqataanerat aningaasanillu navianartorsiornartunik ilisimasanillu tunniussinerat misilittagaqarfiulluarsimasut, Royal Greenlandip erseqqissarpaa.

Inatsisissatut siunnersuut akuerineqarpat ingerlatseqatigiiffiup “aktiaatileqatigiiffiup piginneqataasortaa piginneqataassutsiminik tunisissasoq peqqusinnaanagu” Royal Greenlandip eseqqissarpaa. Piginnittoq sinnerlugu piginneqataassutsinik Naalakkersuisut tuniniaasinnaanissaat aalajangersarneqassasoq Royal Greenlandip siunnersuutigaa.

Immikkut inissisimaffik isornartorsiorneqarpoq

Royal Greenland Namminersorlutik Oqartussanit pigineqarmat aalisarnermut inatsisissatut siunnersuutip immikkoortuini pingaarutilinni arlalinni aalisarnermut suliffeqarfissuaq pineqarneq ajorpoq.

Taamaalilluni Royal Greenland A/S Kitaani raajarniarnermi avataasiorlunilu qaleralinniarneq pillugu pisassiissutinik amerlanerusunik piginnittuusinnaassaaq, ingerlatseqatigiiffiit namminersortut pisassiissutinik tunniussisussaallutik.

Grønlandsbanken tusarniaanermut akissummini allappoq pisortat suliffeqarfiutaata immikkut inissisimaffeqalernera tupigusuutigineqartoq, Sulisitsisullu kattuffiata tamanna unammilleqatigiinnermut akornutaasutut isigaa:

- Taamaattumik Sulisitsisut isumaqarput RG-p inatsimmi immikkut pisinnaatitaaffeqarnera pisassiissutissanillu killiliinissamut piumasaqaatinut ilanngunneqannginnera unammilleqatigiinnermut akornutaallunilu ajornartorsiutaavoq, Sulisitsisut tusarniaanermut akissumminni allapput.

Aningaasat naammappat?

Royal Greenlandip tusarniaanermut akissummini, suliffeqarfiit allat assigalugit, oqaatigaa inatsisissatut siunnersuutip kingunerisaanik pisassiissutit pinngitsaaliissummik tuniniarneqartussat pisiarinissaannut Kalaallit Nunaanni aningaasanik naammattunik peqartoqarnissaa qularnartoq.

Aamma Royal Greenland pisassiissutinik pisinissamut periarfissaqarnavianngilaq:

- Royal Greenlandip pisassiissutitta qaffasinnerpaaffiat tikingajalluinnaqqareerpaa, taamaattumik amerlanerusunik pisassiissutinik pisinissaq ilimananngilaq, tamannalu RG-mi maannakkorpiaq eqqarsaatiginngilarput, Susanne Arfelt Rajamand oqarpoq.