Aalisarnermut inatsisissatut siunnersuut pillugu Sulisitsisunit oqaaserpassuit

Aalisarnermut inatsimmut nutaamut nassuiaammi aalisarnerup ataqatigiissinneqarsimasup pitsaanerpaasutut inuiaqatigiinnullu pissarsiaqarnarnerpaasutut nassuiarneqarnera Sulisitsisuni pisortap, Christian Keldsenip, akerliuffigalugulu paasisinnaanngilaa. Illuatungaanili inatsit akerlerluinnaanik sunniuteqartussatut aaqqissuunneqarsimanerarpaa.

- Taamaattumik aamma naluneqanngilaq inatsisissatut siunnersuut inuiaqatigiit aningaasaqarnerannik ajornerulersitsissasoq, sunniutaarutsitsissammat, Sulisitsisut pisortaat Sermitsiaq.AG-mut oqarpoq.

Allagaatinik takunnikkumaneq itigartinneqarpoq

- Naatsorsuinerit piviusorsiunngitsut pitsaanerpaamillu pisoqarsinnaaneranik tunngavissaqarpasinngitsut pillugit paasissutissanik Sulisitsisut piumasaqaraluarput. Itigartinneqarpugulli, pisortaq oqarpoq, taassumalu tupigusuutigaa Inatsisartuni politikerit tamanna tunngavigalugu nunami inuussutissarsiutit pingaarnersaat nunallu karsianut isertitaqarnerpaaq qanoq ilillutik eqquiniaaffigisinnaaneraat.

- Inatsimmi piumasaqaatit eqqortinneqanngippata inuiaqatigiinnut kingunissat politikerit paasiuminaatsikkunikkit politikerit artornartorsiuleratarsinnaapput, Christian Keldsen oqarpoq.

Aningaasaliisutigut ajornartorsiornerit

Aningaasaliinermi ajornartorsiornerit inatsisip piumasaqaatai malillugit umiarsuarnut aningaasaliinissap qanoq ajornartigineranut isummertoqannginneranik, taanna
immikkoortumik erseqqissaavoq.

- Suliffeqarfissuit aningaasaleeqataasinnaajunnaarput, taamaalilluni aningaasanik pissarsinissaq ajornakusoornerulerluni. Taamaattumik 1980-ikkunnitut aningaasaateqarpallaanngitsumik aalisarneq annertuunik navianaateqartunik kinguneqarsinnaavoq. Tamatuma saniatigut nunatta karsianut inuiaqatigiinnullu isertitaqarpallaanngitsumik pisuussutit aalisarneqarsinnaajunnaarsinnaapput. Navianaat pingaannginnerusoq tassaavoq pisassiissutitut siunnersuutigineqartut eqqorneqassappata, tunngaviusumik inatsit unioqqutillugu, taamaalillunilu Naalakkersuisut eqqartuussivikkut sulianik amerlanerusunik suliaqartariaqalersinnaapput, tamannalu Kalaallit Nunaanni inuussutissarsiortunut allanut Kalaallit Nunaanni aningaasaliinissamut piumassutsimik ajoqusiisinnaavoq, GE-mi pisortaq oqarpoq.

Kioski ataaseq marlulluunniit?

Taanna oqarpoq "raajat aalisakkallu amerlanerusunut agguaannerisigut amerlanerusunik pisaqartoqarsinnaanngitsoq", tamannalu ima assersuusiaraa:
- Oqartoqarsinnaavoq nunami kioskiuteqaraanni ukiumullu 5.000-inik pisiniartoqartarluni, kioskiutilik saniani kioskiliornavianngilaq, taamaaliornikkummi kioskimut 5.000-inik pisiniartartulimmut ataatsimut aningaasartuutinut sanilliullugit kioskinut marlunnut 2.500-nik pisiniartartulinnut immikkut aningaasartuutaassammata. Taamaaliornikkut pisiniartartut amerleriarnavianngillat, aningaasartuutilli amerlaneruliinnassapput, naleqarnerulersitsinermik illuatungilerneqaratik.

- Malitsigisaanik inuit taaneqartunit (inatsimmi, aaqq.) sunniutit
ilaqutariinnut ajornakusoornerulersitsissapput. Inuussutissarsiummik ataasiinnarmik suliffeqarfinnilluunniit arlaqanngitsunik pilersitsinissamut tunngaviusut atorunnaarsinneqarpata, tamanna suliffinnik annaasaqarnermik, nunap karsianut isertitaqarnermik sulisunillu annaasaqarnermik, immaqalu nunami suliffissuit, umiarsuarnik immamiittunik matusinermik imaluunniit kingunerlutsitsinerpaasinnaasumik: suliffeqarfinnik matusinermik kinguneqassaaq, mianersoqqussutigineqarpoq.

Politikkikkut sapiissuseqarnissaq pisariaqarpoq

- Inatsimmik atuutitsilernissaq politikkikkut sapiissuseqangaarnermik pisariaqartitsissaaq, toqqaannanngitsumik qinersisartut qitiusut arlallit, naatsorsuutigisamit amerlanerusut, eqqugaassammata, aamma navianartumik ilisimanngisamik inatsisiliortoqarsinnaammat. Allatut oqaatigalugu inatsisissatut siunnersuut aalisartunut innuttaasunullu atuaruminaannanngilaq, aammali politikerinut atuaruminaassaaq, GE-p pisortaa erseqqissaavoq.