Aalisarnermut inatsisissatut siunnersuut tallimanngorpat aappassaaneerneqassaaq
Aalisarnermut inatsisissap akerleriissutaasup aappassaaneerneqarnissaa Inatsisartut Siulittaasoqarfiata pingasunngornermit tallimanngornermut kinguartippaa.
Aalisarnermut ataatsimiititaliap kaammattuutaa malillugu, aalisarnermut inatsisissatut siunnersuutip aappassaaneerneqarnissaata kinguartinneqarnissaanik Inatsisartut aalajangerput.
Inatsisissatut siunnersuut maajip qulingani oqaluuserisassatuaasoq, Inatsisartut nittartagaanni atuarneqarsinnaavoq. Taamaasillutik politikerit Inatsisartuni ataatsimiiffigisassaat ullormik ataatsimik ilaneqarput.
Inatsisissatut siunnersuut annertooq pillugu Naalakkersuisunut apeqqutit arlallit akissutissarsineqannginnerat pissutigalugu, Aalisarnermut ataatsimiititaliaq kinguartitsinissamik qinnuteqarsimavoq.
Siullermeerneqareermat aalisarnermut ataatsimiititaliamut ingerlateqqinneqarpoq.
Ataatsimiititaliap isumaliutissiissutaata tunniunneqarnissaanut piffissaritinneqartoq pillugu immikkut ittumik akuerineqarnissamik Inatsisartoqarfimmut qinnuteqarpoq. Taamaattumillu isumaliutissiissut ullumi marlunngornermi 7. maj kingusinnerusukkut tunniuttussanngorlugu.
